ထိုင်းနိုင်ငံထဲကို တရားမဝင် ဝင်ရောက်လာတဲ့ မြန်မာနိုင်ငံသားတွေ ၁ ရက်အတွင်းမှာ ၃၆၈ ယောက် ဖမ်းဆီးခံရတယ်လို့ ထိုင်းသတင်းတွေအရ သိရပါတယ်။
ထိုင်းအနောက်ပိုင်း ပရကျူပ်ခီရီခန်ခရိုင်မှာ ဧပြီ ၂၄ ရက် မွန်းလွဲ ၁ နာရီမှ ဧပြီ ၂၅ မွန်းလွဲ ၁ နာရီအတွင်း တရားမဝင်မြန်မာ ၂၁၈ ဦး ဖမ်းဆီးရမိကြောင်း၊ အမျိုးသား ၁၂၅ ဦး အမျိုးသမီး ၉၃ ပါဝင်ပြီး ပရကျူပ်ခီရီခန်မြို့နယ် ကော်လတ်၊ အောဝ်နွဲ့၊ ဟွေ့ဆိုင်း၊ ခလောင်းဝပ် စတဲ့အုပ်စုထဲက နေရာပေါင်း ၅ ခုမှာ ဖမ်းမိကာ ကား ၁ စီး၊ ဆိုင်ကယ် ၁ စီး နဲ့ စိတ်ကြွဆေးပြား ၁၁၂ လုံးတို့ကိုပါ ဖမ်းမိတယ်လို့ ထိုင်းစစ်တပ်သတင်းမှာ ဖော်ပြပါတယ်။
ဒါ့အပြင် ရာ့ချ်ပူရီခရိုင် ဆွန်ဖိန့်မြို့နယ်ထဲမှာလည်း မနေ့ မွန်းလွဲ ၂ နာရီအချိန်က တရားမဝင်မြန်မာ အမျိုးသား ၁၈ ယောက် အမျိုးသမီး၂၂ ယောက် စုစုပေါင်း အယောက် ၄၀ ကို ဖမ်းမိတယ်လို့ ဆိုပါတယ်။
ကန်ကျနပူရီခရိုင်မှာတော့ မနေ့ ညနေ ၄ နာရီမှ ဒီမနက် ၄ နာရီထိ ထောင်းဖာဖူးမြို့နယ် ထာ့ခနွန်အုပ်စု၊ ကန်ကျနပူရီမြို့နယ် ဘန့်ကောင်အုပ်စု၊ တန်မခန်တေ့မြို့နယ်နဲ့ ဆိုင်းယုတ်မြို့နယ် စတဲ့နေရာ ၅ ခုကနေ တရားမဝင် ဝင်လာသူ အမျိုးသား ၄၅ ယောက် အမျိုးသမီး ၂၇ ယောက် စုစုပေါင်း ၇၂ ယောက် ဖမ်းမိခဲ့ပါတယ်။
သူတို့တွေဟာ မော်လမြိုင်၊ ရန်ကုန်၊ ပဲခူး၊ ရခိုင်စတဲ့ဒေသကဖြစ်ပြီး စမွတ်စခွန်း၊ လယောင်း၊ ကန်ကျနပူရီနဲ့ ဘန်ကောက်မှာအလုပ်သွားလုပ်ဖို့ ပွဲစားကို ၁ ယောက် ဘတ် ၂၀,၀၀၀ မှ ၃၀,၀၀၀ ထိပေးပြီး ဝင်ရောက်လာတာလို့ ဆိုပါတယ် ။
တာ့ခ်ခရိုင် ဝမ်ကျောက်မြို့နယ်ထဲမှာလည်း နယ်မြေထဲမှာ တရားမဝင် ဝင်ရောက်မှုတွေရှိမယ်လို့ ကြိုတင်သတင်းရထားချက်အရ ဒုမြို့နယ်မှူး၊ စစ်တပ်နဲ့ ရဲတွေပါတဲ့အဖွဲ့က နယ်မြေထဲ လုံခြုံရေး လိုက်လံစစ်ဆေးစဉ် ကနေ့မနက် ၁ နာရီခွဲလောက်က ချိန်းထောင်းကျေးရွာအုပ်စု တောထဲမှာ မသင်္ကာဖွယ် ရပ်ထားတဲ့ ကား ၃ စီးတွေ့လို့ သွားရောက်စစ်ဆေးရာက ကားပေါ်မှာ တရားမဝင် ဝင်ရောက်လာသူ စုစုပေါင်း ၃၈ ယောက် တွေ့ရကြောင်း၊ ကားသမားနဲ့ လမ်းပြကတော့ ထွက်ပြေးလွတ်မြောက်သွားတယ်လို့ ထိုင်းရတ်သတင်းမှာ ဖော်ပြပါတယ်။
သူတို့တွေဟာ ထိုင်းမှာ အလုပ်လာလုပ်ဖို့ သောင်ရင်းမြစ်ကို ကူးဖြတ်ပြီး တောတောင်ထဲမှာ ၂ ရက်တာ ခြေလျင်လျှောက်ခဲ့ရကြောင်း၊ ပွဲစားကိုလည်း ၁ ဦးလျှင် ဘတ် ၃၀,၀၀၀ စီပေးခဲ့ကာမှ ခုလို ဖမ်းဆီးခံရတာလို့ ဆိုပါတယ်။
