မွန်ပြည်နယ်၊ ရေးမြို့နယ်အထွက်၊ ရွာသစ်ကျေးရွာအနီးရှိ တံတားကြီးမှာ လုံခြုံရေးနေတဲ့ စစ်ကောင်စီရဲတပ်ဖွဲ့ဝင် ၂ ဦး တိုက်ခိုက်ခံရတာကြောင့် သေဆုံးသွားတယ်လို့ ဒေသခံတွေက ပြောပါတယ်။

အဲဒီတံတားမှာ လုံခြုံရေးယူနေတဲ့ စစ်ကောင်စီရဲတပ်ဖွဲ့တွေကို ဧပြီ ၂၃ ရက်နေ့ မနက် ၉ နာရီလောက် မွန်ပြည်နယ်အခြေပြု တော်လှန်ရေးအဖွဲ့အစည်း MSRO က သွားရောက် တိုက်ခိုက်ခဲ့တာ ဖြစ်ပါတယ်။

လုံခြုံရေးယူနေတဲ့ စစ်ကောင်စီရဲတပ်ဖွဲ့ဝင်တွေ တိုက်ခိုက်ခံရတာကြောင့် ရဲအုပ်ရဲလွင်နဲ့ ရဲတပ်သား ဇင်မိုးလင်းတို့ သေနတ်ဒဏ်ရာတွေ ရရှိပြီး ရေးမြို့နယ်ပြည်သူ့ဆေးရုံကို ပို့ဆောင်စဉ် သေဆုံးသွားခဲ့တာ ဖြစ်ပါတယ်။

မွန်ပြည်နယ်အခြေပြု တော်လှန်ရေးအဖွဲ့အစည်း MSRO က တွဲဖက်တာန်ခံ အဂ္ဂကတော့ အဲဒီတံတားမှာ လုံခြုံရေးယူနေတဲ့ စစ်ကောင်စီရဲတပ်ဖွဲ့ဝင်တွေဟာ လမ်းအလယ်မှာ ခုံချပြီး နေ့စဉ်နဲ့အမျှ ခရီးသွားပြည်သူတွေ စိတ်အနှောက်ယှက် ဖြစ်အောင် စစ်ဆေးနေတာကြောင့် သွားရောက် တိုက်ခိုက်ခဲ့တာလို့ DVB ကို ပြောပါတယ်။

တံတား လုံခြုံရေးယူနေတဲ့ စစ်ကောင်စီ ရဲတပ်ဖွဲ့ဝင်တွေကို သွားရောက် တိုက်ခိုက်ပြီးနောက် မွန်ပြည်နယ်အခြေပြု တော်လှန်ရေးအဖွဲ့အစည်း MSRO က ထိခိုက်မှု တစုံတရာမရှိဘဲ အောင်မြင်စွာ ဆုတ်ခွာနိုင်တယ်လို့ ဆိုပါတယ်။

မွန်ပြည်နယ်အခြေပြု တော်လှန်ရေးအဖွဲ့အစည်း MSRO ဟာ စစ်ကောင်စီ ဌာနဆိုင်ရာရုံး၊ Mytel တာဝါတိုင်တွေကို မကြာခဏ ဖောက်ခွဲဖျက်ဆီးတာနဲ့ စစ်ကောင်စီတပ်ဖွဲ့ဝင်တွေကို ကြားဖြတ်တိုက်ခိုက်တာ ဆက်တိုက်လုပ်ဆောင်နေပါတယ်။