မန္တလေးတိုင်း တရားလွှတ်တော်ရုံး သေနတ်ဖြင့် ပစ်ခတ်ခံရ
DVB
·
April 17, 2022
မန္တလေးမြို့ ၊ ချမ်းမြသာစည်မြို့နယ်၊ မြို့သစ် (၁) ရပ်ကွက်၊ ၆၈ လမ်း၊၁၀၄ လမ်း နဲ့ ၁၀၅ လမ်းကြားရှိ မန္တလေးတိုင်းတရားလွတ်တော်ရုံးကို ဧပြီ ၁၇ ရက် မနက် ၁၀ နာရီခွဲလောက်က သေနတ်နဲ့ ပစ်ခတ်ခံခဲ့ရပါတယ်။
သေနတ်နဲ့ ပစ်ခတ်ခံရတာကြောင့် ထိခိုက်ဒဏ်ရာရတာမရှိပေမယ့် စစ်ကောင်စီတပ်သားတွေ စောင့်တဲ့ အစောင့်ကင်းရုံးကို ထိမှန်ခဲ့ပြီး မှန်ကွဲပျက်စီးတာရှိခဲ့တယ်လို့ သိရပါတယ်။
“အရင်တိုင်းတရားရုံးက လမ်း ၃၀ မှာ အခု ၆၈ လမ်းက ရုံးအသစ်မှာရွှေ့ထားတာ။ အမှုစစ်တာတွေ ဘာတွေတော့ လုပ်နေပြီ။ ရုံးရှေ့မှာ အစောင့်တော့ ချထားတယ်။ ဒီနေ့တော့ နှစ်ဆန်းတရက်ဆိုတော့ လူမရှိလောက်ဘူး” လို့ ရှေ့နေတဦးက ပြောပါတယ်။
မန္တလေးတိုင်း တရားလွှတ်တော်ရုံးဘေးမှာ မန္တလေးတိုင်း ဥပဒေချုပ်ရုံးရှိပြီး ဖေဖော်ဝါရီ ၂၂ ရက် က မန္တလေးတိုင်း ဥပဒေချုပ်ရုံးအနီးမှာ လက်လုပ်မိုင်းတလုံး ပေါက်ကွဲခဲ့ပါသေးတယ်။
