ချင်းပြည်နယ်၊ ပလက်ဝမြို့နယ်က နိုင်ငံရေးအကျဉ်းသားတွေ အပါအဝင် ထောင်ချခံထားရသူ ၂၇ ဦးကို ရခိုင်ပြည်နယ် စစ်တွေမြို့ရှိ အကျဉ်းထောင်ကို ပို့ဆောင်လိုက်တယ်လို့ ထောင်ချခံထားရတဲ့ မိသားစုထံက သိရပါတယ်။
အဆိုပါ အကျဉ်းသားတွေဟာ ဧပြီ ၅ ရက်က မြို့နယ်တရားရုံးက နောက်ဆုံး အမိန့်ချထားသူတွေပါဝင်ပြီး စစ်တွေထောင်ကိုတော့ ဧပြီ ၇ ရက်မှာ ရောက်ရှိသွားတာ လို့ ဆိုပါတယ်။
ပုဒ်မ ၅၀၅ တပ်ခံထားရတဲ့ နိုင်ငံရေးအကျဉ်းသားတွေဟာ လူသားချင်း စာနာထောက်ထားတဲ့အနေနဲ့ စစ်ဘေးရှောင်တွေကို အကူအညီပေးနေသူတွေဖြစ်ပြီး ဘာသက်သေ အထောက်အထားမှမရှိပဲ အခုလို ပြစ်ဒဏ်ချမှတ်ခဲ့ရတာလို့ အကျဉ်းသား မိသားစုဝင်တစ်ဦးက ပြောပါတယ်။
အဆိုပါ ၂၇ ဦးထဲက တချို့က ပြီးခဲ့တဲ့နှစ် မေ ၂၈ ရက်က ပလက်ဝမြို့ပေါ် ဗုံးပေါက်ကွဲမှာဖြစ်စဉ်နဲ့ ပတ်သက်ပြီး သံသယရှိတယ်လို့ဆိုကာ ဖမ်းဆီးခံထားရသူ ၄ ဦး ၊ သတင်းမီဒီယာကို အင်တာဗျူးဖြေဆိုလို့ ဖမ်းခံထားရသူ ၁ ဦး ၊ ဒေသခံကာကွယ်ရေးတပ်ဖွဲ့ CDF ကို ထောက်ပံ့တယ်လို့ဆိုကာ စွပ်စွဲခံရသူ ၁၉ ဦးနဲ့ ကျန် ၃ ဦးကတော့ တခြားအမှုတွေဖြစ်တယ်လို့လည်း သိရပါတယ်။
