စစ်ကိုင်းတိုင်း မင်းကင်းမြိုနယ်၊ မုံရွာ၊ ယာကြီး ၊ ကလေး၀ လမ်းပိုင်းကို ပြည်သူတွေ အသုံးမပြုဖို့ PDF က သတိပေးချက် ထုတ်ပြန်ထားပေမယ့် စစ်ယာဉ်တန်းကို ကျော်တက်ပြီး လမ်းအသုံးပြုခဲ့တဲ့ အိမ်စီးကားတစီး ဧပြီ ၅ ရက်နေ့က မိုင်းမိတာကြောင့် လူ ၆ ယောက် သေဆုံးခဲ့တယ်လို့ ဒေသခံတွေနဲ့ ဒေသ တော်လှန်ရေးအဖွဲ့တွေဆီက သိရပါတယ်။ 

မုံရွာ၊ ယာကြီး၊ ကလေး၀လမ်းပိုင်း ကလေး၀မြိုနယ် စခန်းကြီးကျေးရွာအနီး ၂ မိုင်လောက်မှာ အိမ်စီးကားမိုင်းနင်မိပြီး ကားပေါ်ပါ ပြည်သူ ၆ ဦး သေဆုံးခဲ့ကြောင်း စိတ်မကောင်းဖွယ်သိရှိရတယ်လို့ မင်းကင်းမြို့နယ်ပြည်သူ့ကာကွယ်ရေး တပ်ရင်း ၂ က ထုတ်ပြန်ထားပါတယ်။ 

Honda Fit အိမ်စီးကားဟာ လမ်းမှာ စစ်ကောင်စီ ယာဉ်တန်းကို ကျော်တက်ပြီး ရှေ့မှသွားခဲ့တာကြောင့် မိုင်းမိခဲ့တာဖြစ်ပြီး တစီးလုံးနီးပါး ပျက်စီးသွားတယ်လို့ဆိုပါတယ်။

မင်းကင်းမြိုနယ်၊ မုံရွာ၊ ယာကြီး ၊ ကလေး၀ လမ်းပိုင်းကို ပြည်သူတွေ အသုံးမပြုဖို့  တောင်တွင်းပြည်သူ့ကာကွယ်ရေးအဖွဲ့ TDPDF နဲ့ ဒေသခံ ပကဖ အဖွဲ့တွေက မတ်လ ၂၆ ရက်နေ့မှာ ထုတ်ပြန်သတိပေးထားတာပါ။

ဧပြီ ၃ ရက်နေ့ကလည်း အဆိုပါလမ်းပိုင်းရှိ မိုင်တိုင် ၇၀ မှာ စစ်ကား ၄ စီးကို ဒေသခံ ပကဖ အဖွဲ့ တွေက မိုင်းဆွဲတိုက်ခိုက်ခဲ့ကြောင်း၊ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တွေအကြား မိုင်းဆွဲတိုက်ခိုက်မှုတွေ ဆက်တိုက်ရှိခဲ့ကြောင်း၊ ဧပြီ ၅ ရက်က လူ ၆ ဦးသေဆုံးခဲ့တဲ့ မိုင်းအား ဘယ်အဖွဲ့က ထောင်ထားတယ်ဆိုတာ မသိရသေးဘဲ စုံစမ်းနေဆဲ ဖြစ်တယ်လို့ မင်းကင်းမြိုနယ်ပြည်သူ့ကာကွယ်ရေး တပ်ရင်း ၂ က ထုတ်ပြန်ထားပါတယ်။

ပြည်သူတွေအနေနဲ့ အခုကာလ စစ်ရေးလှုပ်ရှားမှုများ ရှုပ်ထွေးနေတာကြောင့် မုံရွာ၊ ယာကြီး၊ ကလေး၀ လမ်းပိုင်းကို အသုံးမပြုကြဖို့နဲ့ မဖြစ်မနေသွားလာလိုပါက ဒေသခံ ကာကွယ်ရေးတပ်ဖွဲ့တွေကို ချိတ်ဆက်အသိပေး မေးမြန်းပြီးမှသာ သွားလာကြဖို့ မင်းကင်းမြိုနယ်ပြည်သူ့ကာကွယ်ရေး တပ်ရင်း ၂ (MKPDF-2) က သတိပေးထားပါတယ်။