စစ်အာဏာစသိမ်းတဲ့အချိန်ကစပြီး ကျန်းမာရေးလုပ်သားအယောက် ၃၀ ကျော်သတ်ဖြတ်ခံခဲ့ရပြီး ၆၀၀ ကျော်ကတော့ စစ်အုပ်စုက ဖမ်း၀ရမ်းထုတ်ထားတဲ့အတွက် တိမ်းရှောင်နေကြရတယ်လို့ မြန်မာနိုင်ငံ လူ့အခွင့်အရေးမှတ်တမ်းကွန်ရက်က ထုတ်ပြန်ပါတယ်။

ဧပြီ ၇ ရက် ကျရောက်တဲ့ ကမ္ဘာ့ကျန်းမာရေးနေ့မှာ ထုတ်ပြန်လိုက်တာဖြစ်ပြီး နိုင်ငံတဝန်း စစ်အုပ်စုက ကျန်းမာရေးလုပ်သားတွေနဲ့ ကျန်းမာရေးဆိုင်ရာအဆောက်အအုံတွေကို တိုက်ခိုက် ခြိးခြောက်တဲ့ အကြိမ်ရေ ၄၀၀ ကျော်ရှိခဲ့ပြီး အဆိုပါတိုက်ခိုက်မှုတွေအတွက် ဆင်ခြေမရှိ၊ အကြောင်းပြချက်မရှိကြောင်းနဲ့ မြန်မာနိုင်ငံက ကျန်းမာရေးလုပ်သားတွေဟာ ပစ်မှတ်တွေ မဟုတ်ဘူးလို့ ကွန်ရက် က ပြောပါတယ်။

စစ်အာဏာရှင်ကို ဆန့်ကျင်ဆန္ဒပြသူတွေ၊ PDF တပ်ဖွဲ့တွေကို ဆေးဝါးကုသပေးနေတဲ့ ဆရာဝန်တွေ၊ ဆေးမှူးတွေကို စစ်အာဏာရှင်တွေက ခြိမ်းခြောက် ပစ်မှတ်ထား တိုက်ခိုက် သတ်ဖြတ်နေတဲ့အပြင် ဆေးဝါးနဲ့ ကုသရေးဆိုင်ရာ ကိရိယာတွေကို တင်းကျပ်ထိန်းချုပ်ထားတာကြောင့် ကိုဗစ်-၁၉ ကပ်ရောဂါ ကူးစက်ခံထားရသူတွေ လုံလောက်စွာ ပြုစုကုသပေးနိုင်ဖို့ အကန့်အသတ်ဖြစ်စေတယ်လို့လည်း ဆိုပါတယ်။

မြန်မာနိုင်ငံမှာ စစ်တပ်က မတရားအာဏာသိမ်းယူထားတဲ့ ကာလဟာ တနှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း တိုင်းပြည်မှာ နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေပါတယ်။