ရခိုင်ပြည်နယ်အတွင်း အာဏာသိမ်းစစ်ကောင်စီက ကျင်းပတဲ့ ၂၀၂၁/၂၀၂၂ ပညာသင်နှစ် တက္ကသိုလ်ဝင် စာမေးပွဲအား လုံခြုံရေးအခြေအနေကြောင့် စာစစ်ဌာန ၂ဝ ကို မြို့ပေါ် ပြောင်းရွှေ့ ဖြေဆိုခဲ့ရတယ်လို့ သိရပါတယ်။
"ဟုတ်ပါတယ်။ လုံခြုံရေးအရ မြို့နယ် ၆ မြို့နယ်က စာစစ်ဌာန ၂၀ ကို မြို့ပေါ်ကို ပြောင်းရွှေ့စစ်ခဲ့ရတယ်” လို့ တာဝန်ရှိသူတဦးက ပြောပါတယ်။
ရခိုင်ပြည်နယ်အတွင်း တက္ကသိုလ်ဝင်စာမေးပွဲ စာစစ်ဌာန ၁၂၈ ခု ဖွင့်လှစ်ထားပြီး နယ်မြေလုံခြုံရေးအရ မောင်တော၊ ဘူးသီးတောင်၊ ရသေ့တောင်၊ ပုဏ္ဏကျွန်း၊ ကျောက်တော်၊ မင်းပြား၊ မြောက်ဦး စတဲ့ ၆ မြို့နယ်က စာစစ်ဌာန ၂၀ ကို မြို့ပေါ်ပြောင်းရွှေ့ စစ်ဆေးခဲ့ရတာပါ။
၂၀၂၀/၂၀၂၁ ပညာသင်နှစ်အတွင်း ကိုဗစ်-၁၉ ရောဂါကြောင့် တနိုင်ငံလုံးရှိ အခြေခံပညာကျောင်းတွေကို ပိတ်ထားခဲ့ကြရပြီး ကျောင်းသူကျောင်းသားတွေ ပညာရေး ၁ နှစ် ဆုံးရှုံးခဲ့ကြရပါတယ်။
အခု ၂၀၂၁/၂၀၂၂ ပညာသင်နှစ်မှာတော့ စစ်အာဏာသိမ်းမှုနဲ့ ကိုဗစ်ကြောင့် ကျောင်းတွေ ယာယီပိတ်ထားခဲ့ကြရပြီး နိုဝင်ဘာ ၁ ရက်မှစတင်ကာ ပြန်လည်ဖွင့်လှစ် သင်ကြားနိုင်ခဲ့ကာ ကျောင်းသူ၊ ကျောင်းသားတွေ စာသင်ချိန်ကာလ ၆ လလောက် ရရှိခဲ့ကြတာပါ။
ရခိုင်ပြည်နယ်တခုလုံးမှာ တက္ကသိုလ်စာမေးပွဲ ဖြေဆိုဖို့ စာရင်းပေးထားသူ အယောက် ၄၅,၆၀၀ ရှိပြီး အဲဒီက ၄၁,၇၅၃ ယောက် ဖြေဆိုခဲ့ကာ ၃,၈၄၇ ယောက် ပျက်ကွက်ခဲ့တယ်လို့ စစ်ကောင်စီ ပညာရေးဌာနရဲ့ အချက်အလက်တွေအရ သိရပါတယ်။
