အမျိုးသားညီညွတ်ရေးအစိုးရ (NUG) က ရောင်းချခဲ့တဲ့ “အောင်လံလွှင့်ချီ နွေဦးထီ”ရောင်းရငွေနဲ့ CDM ဝန်ထမ်း ၁ သိန်း ၈ သောင်းလောက်ကို ချိတ်ဆက်ထားနိုင်ခဲ့ပြီလို့ ထုတ်ပြန်ပါတယ်။

ပြည်သူလူထု အနေနဲ့လည်း နွေဦးထီ ဒါမှမဟုတ် တခြား CDM ထောက်ပံ့အဖွဲ့အစည်းတွေကနေ အကြမ်းဖက်စစ်ကောင်စီ ယန္တရားထောက်တိုင်ကို လှဲဖြိုခဲ့တဲ့ CDM ဝန်ထမ်းတွေကို ချီးမြှင့်ကူညီပေးကြဖို့ တိုက်တွန်းနှိုးဆော်ထားပြီး မိဘပြည်သူတွေကို ပိုမိုလွယ်ကူတဲ့ ထီဝယ်ယူမှု စနစ်ကိုလည်း မကြာခင် မိတ်ဆက်သွားမယ်လို့လည်း ဆိုပါတယ်။

အောင်လံလွှင့်ချီနွေဦးထီကိုတော့ ပြီးခဲ့တဲ့ ၂၀၂၁ ခုနှစ်၊ ဩဂုတ် ၁၅ ရက်နေ့မှာ စတင်ရောင်း ချခဲ့တာဖြစ်ပြီး ထီရောင်းချရမှုရဲ့ ၇၀ ရာခိုင်နှုန်းကို နိုင်ငံ့၀န်ထမ်း CDM တွေအတွက် သုံးစွဲ သွားမှာဖြစ်ပြီး ၃၀ ရာ ခိုင်နှုန်းကို ဆုမဲအဖြစ် ပြန်လည်ပေးအပ်သွားဖို့ ကြေညာထားတာပါ။

လတ်တလောမှာတော့ နွေဦးထီဟာ တော်လှန်သူပြည်သူတွေရဲ့ ဝန်းရံမှုနဲ့ စစ်ကောင်စီရဲ့ အောင်ဘာလေထီကို အလဲထိုးနိုင်ခဲ့သလို CDM ဝန်ထမ်းတွေကိုလည်း ချီးမြှင့်နိုင်ခဲ့ပြီလို့ ဆိုပါတယ်။

ဒါ့အပြင် လက်ရှိအချိန်ထိ နွေဦးထီရဲ့ ကွန်ရက်ကို မြန်မာတနိုင်ငံလုံး လွှမ်းခြုံနိုင်စေဖို့ တာဝန်သိ CDM ဝန်ထမ်းစာရင်းပြုစုတာ၊ စိစစ်တာ၊ ထောက်ပံ့ ID ထုတ်ပေးတာတွေကိုလည်း လုပ်ဆောင်ခဲ့ပြီးဖြစ်တယ်လို့ ဆိုပါတယ်။

နွေဦးထီကတဆင့် ထောက်ပံ့ကူညီခဲ့တဲ့ ဝန်ထမ်းတွေထဲမှာတော့ ၅၁ ရာခိုင်နှုန်းက ပညာရေးဝန်ကြီးဌာနက ဝန်ထမ်းတွေ ဖြစ်တယ်လို့ သိရပါတယ်။ လတ်တလော ချီးမြှင့်နိုင်တဲ့ ဝန်ထမ်းအရေအတွက်ဟာ များပြားတဲ့ ပမာဏတခုဖြစ်ပေမယ့် နွေဦးထီက ချိတ်ဆက်ထားနိုင်တဲ့ ပမာဏနဲ့ယှဉ်ရင်တော့ ၃ ဒသမ ၉ ရာခိုင်နှုန်းသာ ရှိနေသေးတယ်လို့ ဆိုပါတယ်။

ဒါကြောင့်မို့ ပြည်သူတွေအနေနဲ့လည်း တာဝန်သိ CDM ဝန်ထမ်းတွေကို ချီးမြှင့်ရင်း တော်လှန်ရေးမှာ ပါဝင်နိုင်ကြဖို့ နှိုးဆော်ထားပါတယ်။

အာဏာသိမ်း စစ်ကောင်စီကတော့ အဆိုပါထီနဲ့ပတ်သက်ပြီး ဖွင့်လှစ်ရောင်းချသူတွေနဲ့ အားပေးအားမြှောက်ပြုလုပ်သူတွေကို တရားစွဲ၊ ဖမ်းဆီးထောင်ချမယ်လို့ ခြိမ်းခြောက်ထားပါတယ်။

ဒါ့အပြင် မြန်မာပြည်သူတွေ သပိတ်မှောက်ပြီး မထိုးဘဲနေတဲ့ အောင်ဘာလေထီကိုလည်း အွန်လိုင်းကနေရောင်းချဖို့ အာဏာသိမ်း စစ်ကောင်စီက စီစဉ်နေပေမယ့် ခုချိန်ထိ အကောင်အထည်ဖော်နိုင်ခြင်း မရှိသေးပါဘူး။