စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ်အတွင်းက ​ပြည်သူ​တွေရဲ့​နေအိမ်​တွေကို စစ်​ကောင်စီတပ်က မတ် ၁၆ ရက် ​မနက်ပိုင်းမှာ မီးရှို့ဖျက်ဆီး​သွားတာကြောင့် အိမ်ခြေ ၂၀ ကျော် ဆုံးရှုံးသွားတယ်လို့ ​ဒေသခံ​တွေက​ ပြောပါတယ်။

စစ်​ကောင်စီတပ်ဖွဲ့ဟာ မတ် ၁၆ ရက် ဒီနေ့​မနက် ၁၁ နာရီ​ကျော်​လောက်မှာ စတင်မီးရှို့ခဲ့တာဖြစ်ပြီး စုစု​ပေါင်းအိမ်​ခြေ ၂၀ ကျော်နဲ့ နွားစာ​အဖြစ်ထားရှိတဲ့ ​ပြောင်းရိုးစင် ၂ ခုပါ မီး​လောင်ကျွမ်းသွားခဲ့ပြီး နေအိမ် ၂ လုံးကိုလည်း ​မွှေ​နှောက်ရိုက်ဖျက်သွားတယ်လို့ ဆိုပါတယ်။

ဘန့်​ဘွေး​မြောက်ရွာက နေအိမ် ၁၆ လုံး၊ ထန်းဇင်​ကျေးရွာက ၅ လုံးတို့ မီးရှို့ဖျက်ဆီးခံရတာဖြစ်ပြီး လက်ပန်ကျေးရွာက ​နေအိမ် ၂ လုံးကို​တော့ ​မွှေ​နှောက်ရိုက်ဖျက်သွားခဲ့တယ်လို့ ​ဒေသခံ​တွေက ​ပြောပါတယ်။

ဒါ့အပြင် လက်ပန်​ကျေးရွာအ​ရှေ့ဘက်မှာ နွား​ကျွေးဖို့ထားရှိတဲ့ ​ပြောင်းရိုးစင် ၂ ခုကိုလည်း စစ်​ကောင်စီတပ်​တွေက မီးရှို့ဖျက်ဆီးလိုက်ကြတယ်လို့ ဆိုပါတယ်။

ဘန့်​​ဘွေးရွာမ​ကျေးရွာအတွင်းမှာ တပ်စွဲ​နေထိုင်တဲ့ စစ်​ကောင်စီတပ်ဖွဲ့က အင်အား ၂၀ လောက် လာ​ရောက်ဖျက်ဆီးမီးရှို့သွားတာလို့ ​ဒေသခံဦးက ​ပြောပါတယ်။

ဒီနေ့မနက်ပိုင်းက ဘန့်​ဘွေးရွာ​မ​ကျေးရွာအတွင်းမှာရှိတဲ့ စစ်​ကောင်စီတပ်ဖွဲ့ဝင်တဦးရဲ့ မင်္ဂလာ​ဆောင်​ပြုလုပ်​နေစဥ်အတွင်း PDF အဖွဲ့တွေက တိုက်ခိုက်ခဲ့တာကြောင့် စစ်​ကောင်စီတပ်သား ၆ ဦး​သေဆုံးသွား​တယ်လို့ ဆိုပါတယ်။

ဒါ့အပြင် ယင်းမာပင်မြို့က​နေ မုံရွာ ယင်းမာပင်လမ်းအတိုင်း ထွက်ခွာလာတဲ့ စစ်​ကောင်စီတပ်ကို ဖိုလ်ဝင်​တောင်လမ်းခွဲအနီးမှာ PDF အဖွဲ့​တွေက မိုင်းဆွဲတိုက်ခိုက်ခဲ့တယ်လို့ ​ဒေသခံ​တွေက ​ပြောပါတယ်။