မွန်ပြည်နယ် မော်လမြိုင်မှာ ရေသန့်ဈေး တိုးမြှင့်သွားမယ်လို့ မော်လမြိုင်မြို့နယ် ရေသန့်လုပ်ငန်းရှင်များအသင်းက မတ်လ ၁၃ ရက်နေ့မှာ ထုတ်ပြန်ကြေညာလိုက်ပါတယ်။

စက်သုံးဆီဈေးနှုန်း အပါအဝင် အထွေထွေကုန်ကျစရိတ် ကြီးမြင့်နေတဲ့အတွက်ကြောင့် မော်လမြိုင်မြို့နယ် ရေသန့်လုပ်ငန်းရှင်များအသင်းရဲ့ ညှိနှိုင်းသဘောတူညီချက်အရ ရေသန့်ဈေး တိုးမြှင့်ရတာလို့ ဆိုထားပါတယ်။

ဒါကြောင့် မတ်လ ၁၆ ရက်နေ့ကစပြီး ၂၀ လီတာ ရေသန့် ၁ ဘူးကို ကျပ် ၇၀၀ ထိ တိုးမြှင့်သွားမှာ ဖြစ်ပါတယ်။

မော်လမြိုင်မှာတော့ စစ်တပ် အာဏာမသိမ်းခင်က ၂၀ လီတာ ရေသန့် ၁ ဘူးကို ကျပ် ၅၀၀ နဲ့ ဖြန့်ဖြူးရောင်းချပေးခဲ့တာပါ။

ရေသန့်လုပ်ငန်းရှင်တဦးကတော့ အထွေထွေကုန်ကျစရိတ် ကြီးမြင့်နေတဲ့အတွက်ကြောင့် ရေသန့်ဈေး တိုးမြှင့်ရတဲ့အပေါ် ပြည်သူတွေအနေနဲ့ နာလည်းပေးဖို့ မေတ္တာရပ်ခံထားပါတယ်။

မွန်ပြည်နယ်မှာတော့ FDA ထောက်ခံချက် ရရှိထားတဲ့ ရေသန့် လုပ်ငန်းပေါင်း ၆၀ ကျော် ရှိပြီး၊ အဲဒီထဲမှာ စစ်တပ် အာဏာသိမ်းပြီးနောက် ရေသန့်လုပ်ငန်း ၁၀ ခုထက်မနည်း လုပ်ငန်း ရပ်ဆိုင်းထားရပါတယ်။