တောင်ဒဂုံတွင် CNG ဖြည့်ရန် တန်းစီနေသည့် ယာဉ်တန်းကို ကွန်တိန်နာဝင်တိုက်၊ ၄ ဦးသေဆုံး
DVB
·
March 11, 2022
ရန်ကုန်တိုင်းဒေသကြီး၊ တောင်ဒဂုံမြို့နယ်၊ မြို့ဦးကျောင်းတိုက်အနီးရှိ CNG ဓာတ်ငွေ့အရောင်းဆိုင်မှာ ဒီနေ့ မတ်လ ၁၁ ရက် မနက်အစောပိုင်းက CNG တန်းစီနေတဲ့ ယာဉ်တန်းကို ကွန်တိန်နာတစီးက ဝင်တိုက်ခဲ့ပြီး လူလေးဦး သေဆုံးသွားပါတယ်။
ကွန်တိန်နားကား မောင်းနှင်သူဟာ အိပ်ငိုက်ပြီး ကားကို အရှိန်မထိန်းနိုင်ဘဲ CNG တန်းစီနေတဲ့ ကားတန်းကို ဝင်တိုက်မိခဲ့တာဖြစ်ပြီး ဝင်တိုက်တဲ့အရှိန် ပြင်းထန်တယ်လို့ ဒေသခံတွေက ပြောပါတယ်။
ကွန်တိန်နာကား ဝင်တိုက်မှုကြောင့် ကားတွေ တစီးနဲ့တစီး ထပ်ကုန်တဲ့အထိ အရှိန်ပြင်းထန်ခဲ့ပြီး ကားကြားထဲညှပ်မိလို့ သွေးထွက်လွန်တာကြောင့် လူလေးယောက် သေဆုံးပြီး ဒဏ်ရာရရှိသူတွေလည်း ရှိခဲ့ပါတယ်။
လျှပ်စစ်မီး အချိန်ကြာမြင့်စွာ ပြတ်တောက်တာတွေကြောင့် CNG ဖြည့်ရာမှာ အခက်အခဲဖြစ်ပြီး ကားသမားတွေဟာ ဓာတ်ငွေ့ဖြည့်ဖို့ ညကတည်းက လာရောက်တန်းစီပြီး စောင့်ဆိုင်းနေကြရပါတယ်။
