မန္တလေးမြို့၊ ပြည်ကြီးတံခွန်မြို့နယ်၊ ၁၁၇ လမ်း (ကျန်စစ်သားလမ်း)နဲ့ ရန်ကုန် - မန္တလေး ကားလမ်းဆုံမှာ မတ်လ ၂ ရက် ညနေ ၄ နာရီကျော်က ယာဉ်စစ်ဆေးနေချိန် ဗုံးပေါက်ကွဲလို့ ရဲတပ်သား ၂ ယောက် ဒဏ်ရာရခဲ့ပြီး ကားတစီး ဗုံးစမှန်ကာ အနည်းငယ် ထိခိုက်ပျက်စီးသွားပါတယ်။
“ပေါက်တဲ့ အချိန်မှာတုန်းကတော့ ရှိမနေဘူး။ ရဲနှစ်ယောက်ကိုတော့ ဒဏ်ရာရလို့ ကားနဲ့ ခေါ်သွားတယ်ကြားတယ်။” လို့ ပြည်ကြီးတံခွန်မြို့နယ်မှာ နေထိုင်သူတယောက်က ပြောပါတယ်။
ဗုံးပေါက်ကွဲမှုကြောင့် ပြည်ကြီးတံခွန်မြို့မရဲစခန်းက ရဲတပ်သား ငြိမ်းချမ်းအောင်မှာ ဒူးနဲ့ ပေါင်၊ တို့မှာ ဖောက်ဝင်ဒဏ်ရာ၊ ရဲတပ်သား ချစ်ကိုကိုကတော့ မေးစေ့ ကနေ လျှာပေါက်ထွက်ဒဏ်ရာ ရရှိခဲ့ပါတယ်။
ဖေဖော်ဝါရီ ၂၃ ရက်ကလည်း ပြည်ကြီးတံခွန်မြို့နယ်၊ ရန်ကုန် - မန္တလေး လမ်းဟောင်းနဲ့ သခင်ဖိုးလှကြီးလမ်း လမ်းဆုံ ရတနာပုံတက္ကသိုလ်သွားလမ်း မီးပွိုင့် စစ်ဆေးရေးလုပ်နေတဲ့နေရာမှာ ဗုံးပေါက်ကွဲပြီး မြို့နယ် ရဲမှူး အပါအဝင် ၁၁ ယောက်လောက် ဒဏ်ရာရခဲ့ပါတယ်။
