ဒီးမော့ဆိုတိုက်ပွဲတွင် စစ်ကောင်စီတပ်သား ၂၄ ဦး သေ၊ တင့်ကား ၁ စီး ပျက်စီး
DVB
·
March 2, 2022
ကရင်နီ (ကယား) ပြည်နယ်၊ ဒီးမော့ဆိုမြို့နယ်၊ အိုကေကျေးရွာအုပ်စု ကျွန်းတော်ကျေးရွာမှာ စစ်သားအင်အား ၁၀၀ လောက် တပ်ချနေရာယူထားတဲ့ စစ်ကောင်စီတပ်ကို ကရင်နီ ပူးပေါင်းတပ်တွေက သွားရောက်တိုက်ခိုက်ခဲ့ရာမှာ စစ်ကောင်စီဘက်က ၂၄ ယောက် သေဆုံးပြီး တင့်ကားတစီးကို ဖျက်ဆီးနိုင်ခဲ့တယ်လို့ ဒီးမော့ဆို PDF က သတင်းထုတ်ပြန်ထားပါတယ်။
မတ်လ ၁ ရက် မနေ့ မွန်းလွဲ ၂ နာရီကနေ ၅ နာရီအထိ ၃ နာရီကြာ အပြန်အလှန် တိုက်ပွဲဖြစ်ပွားတာ ဖြစ်ပြီး စစ်ကောင်စီဘက်က ၂၄ ယောက် သေဆုံးသွားရပြီး ပြည်သူ့ကာကွယ်ရေးတပ်ဘက်က ၁ ဦး ထိခိုက်ဒဏ်ရာရရှိခဲ့ကြောင်း ဖော်ပြပါတယ်။
စစ်ကောင်စီတပ်တွေဟာ အခုရက်ပိုင်းအတွင်း ဒီးမော့ဆိုမြို့နယ်မှာ နယ်မြေစိုးမိုးနိုင်ရေး အင်အားအဆမတန် ဖြည့်တင်းလာနေတဲ့အတွက် စစ်ရှောင်ပြည်သူတွေ ထပ်ဆင့် တိမ်းရှောင်နေရပါတယ်။
