စစ်ကိုင်းတိုင်း ယင်းမာပင်မြို့နယ်အရှေ့ဘက် နှောရိုးရွာအနီးမှာ ဖေဖော်ဝါရီလ ၂၁ ရက်နေ့ မနက်အစောပိုင်းက စစ်ကောင်စီခန့် စစ်ကိုင်းတိုင်း ဝန်ကြီးချုပ် ဦးမြတ်ကျော်ရဲ့ ယာဉ်တန်းကို မြောက်ယမားပြည်သူ့ကာကွယ်ရေးတပ်ဖွဲ့က မိုင်းဆွဲတိုက်ခိုက်ခဲ့တယ်လို့ သိရပါတယ်။
စစ်ကောင်စီခန့် ဝန်ကြီးချုပ် ဦးမြတ်ကျော်ရဲ့ယာဉ်တန်းကို ဒီကနေ့ မနက်အစောပိုင်းက ယင်းမာပင်မြို့ပေါ် ဘုန်းကြီးကျောင်းတစ်ကျောင်းက အောက်စီဂျင်စက်ရုံဖွင့်လှစ်ပွဲ လာတဲ့အချိန် မိုင်းဆွဲတိုက်ခဲ့တာလို့ မြောက်ယမား PDF တာဝန်ရှိသူတစ်ဦးက ပြောပါတယ်။
“မိနစ်အနည်းငယ်ကြာအောင် ပစ်ခတ်ခဲ့ကြတယ်။ ကျနော်တို့က မိုင်းနဲ့တိုက်ခိုက်ခဲ့လို့ သူတို့ဘက်က အထိနာသေဆုံးမှုတွေရှိတယ်။ လူနာတင်ကားနဲ့ သူတို့ ရဲဘော်တွေကို လာသယ်သွားကြတယ်။”
စစ်ကောင်စီတပ်က စက်သေနတ်တွေ၊ လက်နက်ကြီးတွေနဲ့ တရစပ် ပစ်ခတ်ခဲ့ပေမယ့် မြောက်ယမားပြည်သူ့ကာကွယ်ရေးတပ်ဖွဲ့ဘက်က ထိခိုက်မှုမရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။
