စစ်ကိုင်းတိုင်း၊ အနောက်မြောက်တိုင်း စစ်ဌာနချုပ် (နမခ) ‌မုံရွာ လေတပ်စခန်းကို ဖေဖော်ဝါရီ ၁၈ ရက် မနေ့ညနေ ၆ နာရီလောက်က ဒေသခံကာကွယ်ရေးတပ်ဖွဲ့တွေ စုပေါင်းပြီး ရှော့တိုက်ဒုံး ၆ လုံးနဲ့ ပစ်ခတ်တိုက်ခိုက်ခဲ့တယ်လို့ မုံရွာ‌အခြေစိုက် ပြည်သူ့ကာကွယ်ရေးတပ်ဖွဲ့ Freedom Revolution Force က ထုတ်ပြန်ကြေညာထားပါတယ်။

Freedom Revolution Force နဲ့အတူ မဟာမိတ်တပ်ပေါင်းစုတွေဖြစ်ကြတဲ့ KG ၊ ဗိုလ်လင်းယုန် စတဲ့ အဖွဲ့တို့ ပူးပေါင်းပြီး 107 MM ရှော့တိုက်ဒုံး ၆ လုံးနဲ့ ပစ်ခတ်တိုက်ခိုက်ခဲ့တာလို့ ထုတ်ပြန်ချက်မှာ ပါရှိပါတယ်။

လေယာဉ်တွေထားတဲ့ နေရာကို  ပြည်သူ့ကာကွယ်ရေးတပ်တွေက နှစ်ဘက်ညှပ်ပြီး ပစ်ခတ်တိုက်ခိုက်ခဲ့တာဖြစ်ပြီး ထိခိုက်ပျက်စီးမှု အခြေအနေကိုတော့ မသိရသေးဘူးလို့ ဒေသခံတယောက်က ပြောပါတယ်။ 

တိုက်ခိုက်အပြီးမှာ မဟာမိတ်တပ်ပေါင်းစုတွေအားလုံး အောင်အောင်မြင်မြင်နဲ့ ဆုတ်ခွာနိုင်ခဲ့တယ်လို့လည်း ဖော်ပြထားပါတယ်။ ဒီဖြစ်စဉ်နဲ့ ပတ်သက်လို့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။