ဧရာဝတီတိုင်း၊ ပန်းတနော်မြို့နယ်၊ အင်းမကျေးရွာမှာ ဖေဖော်ဝါရီ ၁၂ ရက် မွန်းလွဲပိုင်းက မင်္ဂလာဆောင်ကနေ ပြန်လာသူတွေလိုက်ပါလာတဲ့ ယာဉ်တစီးတိမ်းမှောက်မှုကြောင့် လူ ၁၅ ဦး ထိခိုက်ဒဏ်ရာတွေရရှိခဲ့ပါတယ်။
ရန်ကုန်-ပုသိမ်ကားလမ်းအတိုင်းမောင်းလာတဲ့ ယာဉ်ဟာ အင်းမနဲ့ ပသွယ်ကြားမှာ တိမ်းမှောက်ခဲ့တာကြောင့် ယာဉ်ပေါ်မှာလိုက်ပါလာသူ ၁၅ ဦး ထိခိုက်ဒဏ်ရာရရှိခဲ့တာလို့ ဒေသခံတွေက ပြောပါတယ်။
ဘက်စုံလူမှုကူညီရေး အဖွဲ့ဝင်တယောက်က “ယာဉ်မှောက်နေတာတွေ့လို့ ကူညီပေးခဲ့တာ အားလုံး ၁၅ ယောက် မင်္ဂလာဆောင်က အပြန်မှာဖြစ်တာလို့ ပြောတယ်။ ကားကိုရှောင်လိုက်လို့ မှောက်တာလို့တော့ပြောတယ်။ ဆေးရုံကို ပို့ပေးခဲ့တယ်”လို့ ဒီဗွီဘီကိုပြောပါတယ်။
ကားမှောက်လို့ ဒဏ်ရာရရှိတဲ့လူနာတွေကို ဘက်စုံလူမှုကူညီရေးကားနဲ့ နှစ်ခေါက် တခြားပရဟိတလူနာတင် ကားနဲ့ တခေါက် သယ်ဆောင်ကာ အင်းမဆေးရုံကို ပို့ဆောင်ပေးခဲ့ရတယ်လို့ ဆိုပါတယ်။
ရန်ကုန် - ပုသိမ်ကားလမ်းမှာ ယာဉ် နှစ်စီးရှောင်တိမ်းဖို့အတွက် ကျဉ်းလွန်းတာကြောင့် မကြာခဏ ယာဉ်တိုက်မှုတွေ တိမ်းမှောက်မှုတွေဖြစ်လေ့ရှိပြီး မိုးရာသီမှာ ပိုအဖြစ်များတယ်လို့ ပရဟိတအသင်းအဖွဲ့တွေက ပြောပါတယ်။
