စစ်ကိုင်းတိုင်း၊ က​လေးခရိုင်၊ မင်းကင်းမြို့နယ်မှာ ​ဖေ​ဖော်ဝါရီ ၁၀ ရက်​နေ့မနက်ပိုင်းက ​​ကျေးရွာ ၂ ရွာက​ နေအိမ်တွေကို စစ်ကောင်စီတပ်က မီးရှို့ဖျက်ဆီးခဲ့ပြီး ပြည်သူ ၅ ဦးကိုလည်း သတ်ဖြတ်သွားခဲ့တယ်လို့ သိရပါတယ်။

မောက်တက်​ကျေးရွာက အိမ်​ခြေ ၁၀၀ ​ခန့်နဲ့ မုဿာ(မုတ်သာ)​ကျေးရွာက အိမ်​ခြေ ၈၀ ​လောက် အိမ်​ခြေပေါင်း ၁၈၀ ဝန်းကျင်လောက် ​မီး​လောင်ကျွမ်းခဲ့တယ်လို့ ​ဒေသခံ​တွေက ​ပြောပါတယ်။ 

ဒါ့အပြင် ​ကျေးရွာလုံခြုံ​ရေး ကင်း​စောင့်​​နေတဲ့ ပြည်သူ ၄ ဦးအပါအဝင် ရွာသား ၅ ဦးကို ပစ်သတ်ခဲ့ကြပြီး ပစ်သတ်ခံခဲ့ရတဲ့ ​မောက်တက်​ကျေးရွာက အမျိုးသားရဲ့ဇနီးကိုလည်း ​လက်ရှိအချိန်ထိ ရှာမ​တွေ့​သေးဘဲ ​ပျောက်ဆုံး​နေတယ်လို့ ​ပြောပါတယ်။

မင်းကင်းမြို့နယ် ပြည်သူ့ကာကွယ်​ရေးတပ်ရင်း(၃)တပ်ခွဲ(၃)တပ်မှူးက “သူတို့ (စစ်​ကောင်စီတပ်ဖွဲ့) ​က အင်အား  ၂၀၀ ​လောက်နဲ့ စနဗျင်း​ကျေးရွာဘက်က​နေ စစ်​ကြောင်း ၄ ​ကြောင်းထိုးပြီး ​ကျေးရွာ​တွေထဲကို မနက် ၅ နာရီခန့်​လောက်မှာ စဝင်တယ်။ ​မောက်တက်​ကျေးရွာကို​ ​စစ်​ကြောင်း တစ်​ကြောင်းထိုးကာ သေနတ် တစ်ချက်မှမ​ဖောက်ဘဲ ဝင်လာပြီး မုဿာ(မုတ်သာ)​ကျေးရွာကို​တော့ စစ်​ကြောင်း ၃ ​ကြောင်းထိုးကာ ​​သေနတ်တွေပစ်ခတ်ပြီး​တော့ ဝင်လာခဲ့တာ" လို့ ​ပြောပါတယ်။