မြန်မာနိုင်ငံက ထွက်ရှိတဲ့ ပဲပုပ်၊ ပီလောပီနံ၊ ကန်စွန်းဥ တို့ကို တရုတ်နိုင်ငံကို တင်ပို့နိုင်ဖို့ နှစ်ဖက် သဘောတူစာချုပ်တွေ မကြာမီ လက်မှတ်ရေးထိုးနိုင်ဖို့ ညှိနှိုင်းဆောင်ရွက်နေတယ်လို့ စစ်ကောင်စီ စိုက်ပျိုးရေး၊ မွေးမြူရေးနဲ့ ဆည်မြောင်း၀န်ကြီးဌာနကနေ သိရပါတယ်။

ဒါ့အပြင် နာနတ်သီး၊ ထောပတ်သီး၊ ကျွဲကောသီး၊ သံပုရာသီး၊ ကွမ်းသီးအစိမ်း စတဲ့ ပို့ကုန် အမယ်တွေအတွက်လည်း အပင်နဲ့တိရစ္ဆာန် ကျန်းမာရေးနဲ့ ပိုးမွှားကင်းစင်ရေး လက်မှတ်ရေး ထိုးနိုင်ဖို့လိုအပ်တဲ့  ပိုးမွှားရောဂါဆန်းစစ်မှု ဆိုင်ရာအချက်အလက်တွေကို နှစ်ဘက်ညှိနှိုင်း  ဆောင်ရွက်နေတယ်လို့ ဆိုပါတယ်။

လယ်ယာကဏ္ဍ ထွက်ကုန်တွေ၊ တိရစ္ဆာန်အရှင်၊ အသား၊ ငါးတွေ ပြည်ပတင်ပို့ရာမှာ ကျန်းမာရေးနဲ့ ပိုးမွှားကင်းစင်ကြောင်း အသိအမှတ်ပြု လက်မှတ်တွေ လိုအပ်ပါတယ်။ အရပ်သားအစိုးရလက်ထက် ၂၀၂၀ ဇန်န၀ါရီလအတွင်း တရုတ်နိုင်ငံကို မြန်မာနိုင်ငံက ဆန်/ ဆန်ကွဲ၊ ပိုးအိမ်ခြောက်၊ ကျွဲ၊နွားအရှင်တင်ပို့ရေးအတွက် အပင်နဲ့ တိရစ္ဆာန် ကျန်းမာရေးနဲ့ ပိုးမွှားကင်းစင်ရေး (SPS)သဘောတူစာချုပ်တွေကို စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာနနဲ့ တရုတ်အကောက်ခွန် အထွေထွေအုပ်ချုပ်မှု အာဏာပိုင်အဖွဲ့(GACC)တို့အကြား လက်မှတ်ရေးထိုးခဲ့ပြီး ဖြစ်ပါတယ်။

မကြာသေးခင်ကလည်း မြန်မာ့ပြောင်းကို တရုတ်နိုင်ငံသို့ တင်ပို့ဖို့  အပင်နဲ့တိရစ္ဆာန်ကျန်းမာရေးနဲ့ ပိုးမွှားကင်းစင်ရေး (SPS) စာချုပ်ကို တရုတ်နိုင်ငံနဲ့ နှစ်ဘက် လက်မှတ်ရေးထိုးခဲ့ပါတယ်။

တရုတ်နိုင်ငံအနေနဲ့ အခုနှစ် ဇန်န၀ါရီ ၁ ရက်က စတင်ပြီး တရုတ်အကောက်ခွန် အထွေထွေအုပ်ချုပ်မှု အာဏာပိုင်အဖွဲ့(GACC)မှာ မှတ်ပုံတင်ထားတဲ့ လုပ်ငန်းတွေက စားသောက်ကုန်တွေကိုသာ တရား၀င် တင်သွင်းခွင့်ပြုထားပါတယ်။