ချင်းပြည်နယ်၊ ကန်ပက်လက်မြို့နယ်မှာ ဇန်နဝါရီ ၃၁ ရက်မနက်ပိုင်းက ကန်ပက်လက် CDF နဲ့စစ်ကောင်စီတပ်တွေတိုက်ပွဲ ဖြစ်ပွားခဲ့ပြီး စစ်ကောင်စီတပ်သား ၃ ယောက်သေဆုံးကာ အများအပြားဒဏ်ရာရရှိသွားတယ်လို့ ကန်ပက်လက် CDF ကနေ သိရပါတယ်။

ကန်ပက်လက်မြို့ ရန်အောင်စေတီ၊မြို့နယ်ပညာရေးမှူးရုံးနဲ့ မြို့နယ်ထွေအုပ်ရုံးတွေမှာတပ်စွဲထားတဲ့ စစ်ကောင်စီတပ်တွေကို ဒီကနေ့မနက် ၆ နာရီခွဲ လောက်မှာ ကန်ပက်လက် CDF က ဝင်ရောက်တိုက်ခိုက်ခဲ့တာဖြစ်ပါတယ်။

 ကန်ပက်လက် CDF ရဲ့ ပြန်ကြားရေးတာဝန်ခံက “အပြန်အလှန်ထိတွေတိုက်ပွဲ ဖြစ်ပွားတာ တစ်နာရီခွဲလောက်ကြာတယ်ဗျ။ စစ်ကောင်စီတပ်ဘက်က ၃ ယောက်သေဆုံးကာ အများအပြားဒဏ်ရာရရှိသွားတယ်။ အဲဒီတိုက်ပွဲမှာ စစ်ကောင်စီတပ်ဘက်က ပြန်လည်ပစ်ခတ်ပေမဲ့ ကျနော်တို့ ကန်ပက်လက် CDF က ရဲဘော်တွေ အထိခိုက် အကျဆုံးမရှိဘဲ အောင်အောင်မြင်မြင်ဆုတ်ခွာနိုင်ခဲ့ကြတယ်”လို့ ပြောပါတယ်။

စစ်ကောင်စီတပ်တွေဟာ ချင်းပြည်နယ်ထဲမှာ ဒေသခံပြည်သူတွေရဲ့ နေအိမ်တွေကို မီးရှို့ဖျက်ဆီးတာတွေ ၊ အပြစ်မဲ့ ပြည်သူတွေကို ဖမ်းဆီးသတ်ဖြတ်ပြီး၊ လူသားဒိုင်းအဖြစ်အသုံးပြုတာတွေ၊ ပြည်သူတွေရဲ့ ပစ္စည်းတွေကို ခိုးယူတာတွေနဲ့ အိမ်မွေးတိရိစ္ဆာန်တွေကို သတ်ဖြတ်စားသောက်တာတွေ ဆက်တိုက်ပြုလုပ်နေတယ်လို့ဆိုပါတယ်။

နှစ်ဖက်တိုက်ပွဲတွေနဲ့ ပတ်သက်လို့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။