ပဲခူးတိုင်းဒေသကြီး၊ ပဲခူးမြို့မှာ ပြည်သူ့ကာကွယ်ရေးတပ်ဖွဲ့ - PDF နဲ့ ဆက်စပ်တယ်ဆိုပြီး စစ်ကောင်စီက လူငယ် အယောက် ၄၀ ကျော်ကို အခုရက်ပိုင်းအတွင်း ဖမ်းဆီးသွားကြောင်း ပဲခူးမြို့ခံတွေက ပြောပါတယ်။
ပဲခူးမြို့ခံ လူငယ်တယောက်ကို အမြန်လမ်းပေါ် ရန်ကုန်ကနေ မန္တလေးကို သွားတဲ့ ကားတစီးပေါ်မှာ ဖမ်းဆီးရမိရာမှတဆင့် ကွင်းဆက် လိုက်လံဖမ်းဆီးတာလို့ ပဲခူးမြို့ခံတစ်ဦးက ဒီဗွီဘီကို ပြောပါတယ်။
“လွန်ခဲ့တဲ့တပတ်လောက်က တစ်ယောက်ကို ရန်ကုန်-မန္တလေးအမြန်လမ်း မန္တလေးသွားကားပေါ်မှာ မိသွားတာကို သတင်းဖုံးထားပြီး ဖုန်းကွင်းဆက်တွေကနေတဆင့် လိုက်ဖမ်းရာက ပါကုန်ကြတာ။ ဖမ်းခံရတဲ့ထဲမှာ ဗကသ အုပ်စုတွေများတယ်။”
ပထမဆုံး ဖမ်းမိသူရဲ့ ကွင်းဆက်တစ်ခုကနေတဆင့် လူငယ် ၆ ဦးကို တစ်ကြိမ်၊ ၁၇ ဦးကို တစ်ကြိမ်၊ ၄ ဦးကို တစ်ကြိမ်၊ ၂ ဦးကို တစ်ကြိမ်၊ နောက်ထပ် ၂ ဦးကို တစ်ကြိမ် ဖမ်းဆီးသွားပြီး တခြားဖုန်းမက်ဆေ့ Group တစ်ခုကနေ တဆင့်လည်း ဖမ်းဆီးခံရတဲ့ လူငယ်တွေ ရှိသလို စုစုပေါင်း အယောက် ၄၀ လောက် ဖမ်းဆီးခံတယ်လို့ အဲဒီမြို့ခံက ပြောပါတယ်။
ဖမ်းဆီးခံရသူတွေနဲ့ အဆက်အစပ်ရှိသူတွေလည်း ထွက်ပြေးတိမ်းရှောင်နေရပြီး ဒီဇင်ဘာ ၁၄ ရက်ကလည်း လူငယ် ၃ ယောက်ကို ရာဘာခြံတစ်ခုအတွင်း ဖမ်းဆီးသွားတယ်လို့ ထွက်ပြေးတိမ်းရှောင်နေရသူ တယောက်က ပြောပါတယ်။
ပဲခူးမြို့က လူငယ်တွေအနေနဲ့လည်း ဖမ်းဆီးရမိသူတွေရဲ့ အကောင့်တွေ၊ ဖုန်းနံပါတ်တွေကနေ တဆင့် ဆက်သွယ်လာရင် သတိထားကြဖို့ သူက သတိပေးပါတယ်။
