ပဲခူးတိုင်း၊ သဲကုန်းမြို့နယ်ထဲမှာ ဒီဇင်ဘာလ ၁၃ ရက် မနက်ပိုင်းက အမျိုးသားတယောက် သေနတ်နဲ့ ပစ်ခံရပြီးနောက်မှာ အမျိုးသမီး ၃ ယောက်နဲ့ ကလေးတယောက်ကို စစ်တပ်က လာရောက် ဖမ်းဆီးသွားတယ်လို့ ဒေသခံဆီက သိရပါတယ်။
ပုတီးကုန်းမှာနေထိုင်တဲ့ ဦးဇော်ဝင်း ဆိုသူဟာ ဒီဇင်ဘာလ ၁၃ ရက် မနက် ၈ နာရီခွဲလောက်က ပုတီးကုန်းမြို့ကနေ သဲကုန်းမြို့ပေါ်ကိုအသွား ဇလေ့ကျေးရွာနဲ့ ဆင်လူးကျေးရွာကြားမှာ နောက်ကနေ ဆိုင်ကယ်နဲ့ လိုက်လာပြီး သေနတ်နဲ့ ပစ်သတ်ခံရတာလို့ သိရပါတယ်။
“မနေ့က သူ (ဦးဇော်ဝင်း) အသတ်ခံရပြီးတဲ့နောက် သဲကုန်း၊ ပုတီးကုန်း၊ ဆင်မြီးစွဲ၊ ဝက်ပုတ်မြို့ အဝင်အထွက်တွေမှာ ကင်းပုန်းတွေချပြီး စစ်တယ်၊ စာသင်ကျောင်းတွေမှာလည်း တပ်စွဲထားတယ်။ ပုတီးကုန်းမြို့က အိမ်တအိမ်ကိုဝင်ရှာတာ လူမတွေ့တော့ အိမ်ကိုရိုက်နှက်ဖျက်ဆီးသွားတယ်။ နောက် သဲကုန်းမြို့ပေါ်ရပ်ကွက်ထဲက အမျိုးသမီး နှစ်ယောက်၊ နတ္တလင်းမြို့နယ်ထဲက အမျိုးသမီး တယောက်နဲ့ ကလေးတယောက်ကို ဖမ်းခေါ်သွားတယ်။ အဖမ်းခံရတဲ့ အထဲက အမျိုးသမီးနှစ် ယောက်ကတော့ သဲကုန်းရဲစခန်းမှာ မတွေ့ရဘူး။ ဘယ်ခေါ်သွားလဲဆိုတာလဲ မေးလို့မရဘူး” လို့ ဒေသခံတယောက်က ပြောပါတယ်။
အသတ်ခံရတဲ့ ဦးဇော်ဝင်းဟာ ပုတီးကုန်းမြို့ပေါ်မှာ နေထိုင်သူဖြစ်ပြီး ဘာကြောင့် အသတ်ခံရတယ်ဆိုတာကိုတော့ မသိရသေးပါဘူး။
ဒေသခံတယောက်က “ဦးဇော်ဝင်းက အရင်က ရွှေဆိုင်လည်း ဖွင့်ဖူးတယ်။ နောက်တော့ ကားဂိတ်လုပ်တယ်။ ဒါပေမဲ့ သူက တခရိုင်လုံးက ရဲတွေနဲ့ပိုင်တော့ ဘာအမှုအခင်းဖြစ်ဖြစ် သူ့ကို အကူအညီတောင်းရတာ။ သူက သတင်းထောက်လည်း လုပ်တယ်ပြောတာပဲ။ ဘယ်မှာ ရေးမှန်းတော့ တခါမှမတွေ့ဖူးဘူး” လို့ ပြောပါတယ်။
အခုအဖမ်းခံရတဲ့ အမျိုးသမီး ၃ ယောက်ဟာ ဦးဇော်ဝင်း အသတ်ခံရမှုနဲ့ ဘယ်လို ပတ်သက်နေတယ် ဆိုတာကိုတော့ ရှင်းရှင်းလင်းလင်း မသိရသေးပါဘူး။
