ရေးမြို့နယ်ကနေ သံဖြူဇရပ်ဘက်ကို ဦးတည်မောင်းလာတဲ့ စစ်ကောင်စီတပ်ဖွဲ့ဝင်တွေ လိုက်ပါလာတဲ့ ကား ၁ စီးကို ရေး-မော်လမြိုင်သွားကားလမ်း လိမ္မော်ခြံကျေးရွာနဲ့ အောင်သပြေကျေးရွာကြားမှာ ဒီဇင်ဘာ ၇ ရက်နေ့ မနက် ၈ နာရီခွဲလောက် မိုင်းဆွဲတိုက်ခိုက်ခဲ့တယ်လို့ ရေး PDF က ပြောပါတယ်။
ရေးမြို့နယ် အောင်သုခ ဇရပ်အနီးမှာ မိုင်းဆွဲတိုက်ခိုက်ခဲ့တာဖြစ်ပြီး စစ်ကောင်စီဘက်က ၉ ဦး သေဆုံးခဲ့ပြီး ၁ ဦး ဒဏ်ရာရခဲ့တယ်လို့ ဆိုပါတယ်။
ငြိမ်းချမ်းစွာ ဆန္ဒပြပြည်သူတွေကို စစ်ကောင်စီတပ်က လူမဆန်စွာ သတ်ဖြတ်တဲ့အတွက် အခုလို တိုက်ခိုက်ခဲ့တာဖြစ်ပြီး စစ်အာဏာရှင်စနစ် ကျဆုံးသည်အထိ တိုက်ပွဲဝင်သွားမယ်လို့ ဆိုပါတယ်။
မိုင်းဆွဲတိုက်ခိုက်ခံရမှုကြောင့် သေဆုံးဒဏ်ရာရတာနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မရှိသေးပါဘူး။
ရေး-မော်လမြိုင်သွားကားလမ်းမပေါ်မှာ ရေး PDF နဲ့ စစ်ကောင်စီတပ်တို့ မကြာခဏထိတွေ့ ပစ်ခတ်မှုဖြစ်ပွားနေတယ်လို့ သိရပါတယ်။
ဒီဇင်ဘာ ၆ ရက်နေ့ မနက် ၉ နာရီလောက်ကလည်း ရေးမြို့နယ် ကရင်အမျိုးသားအစည်းအရုံး (ကေအန်ယူ) တပ်မဟာ ၆ နယ်မြေမှာ နှစ်ဖက် တိုက်ပွဲဖြစ်ပွားဖြစ်ပြီး စစ်ကောင်စီဘက်က ၃ ဦး ကျဆုံးခဲ့တယ်လို့ သိရပါတယ်။
