ကယားပြည်နယ်၊ ဖရူဆိုမြို့နယ်၊ ဟိုယာကျေးရွာမှာ နိုဝင်ဘာ ၂၇ ရက် ဒီနေ့မနက်က အမျိုးသမီးများပေါ် အကြမ်းဖက်မှုပျောက်ရေး ဖဲကြိုးဖြူလှုပ်ရှားမှု ပြုလုပ်ခဲ့ပါတယ်။
“ပြစ်ဒဏ်ကင်းလွတ်ခွင့် အလေ့အထအမြစ်ဖြတ်၊ အမျိုးသမီးများအပေါ် အကြမ်းဖက်မှု အဆုံးသတ်” ဆောင်ပုဒ်နဲ့ အမျိုးသမီးတွေအတွက်အမျိုးသမီးဖောင်ဒေးရှင်း (WWF)နဲ့ ကရင်နီ အမျိုးသမီးအစည်းအရုံး (KNWO)တို့ပူးပေါင်းပြီး ဖဲကြိုးဖြူလှုပ်ရှားမှု လုပ်ဆောင်ခဲ့ကြတာ ဖြစ်ပါတယ်။
ဖဲကြိုးဖြူ လှုပ်ရှားမှုမှာ တိုက်ပွဲကြောင့် တိမ်းရှောင်နေကြရတဲ့ စစ်ဘေးရှောင်တွေ၊ ဒေသခံပြည်သူတွေနဲ့ တော်လှန်ရေးတပ်ဖွဲ့တွေလည်း ပါဝင် တက်ရောက်ခဲ့ပါတယ်။
အဆိုပါ လှုပ်ရှားမှုအတွင်း ဖဲကြိုးဖြူလှုပ်ရှားမှုအကြောင်းကို ပညာပေးဟောပြောတာ၊ အမေးအဖြေကဏ္ဍများပြုလုပ်တာ၊ တိုက်ပွဲတွေအတွင်း အိုးအိမ်စွန့်ခွာနေကြတဲ့ စစ်ရှောင်အမျိုးသမီးတွေရဲ့ အခက်ခဲတွေကို ရင်ဖွင့်ပြောပြတာ အပြင် ပြဇာတ်ကတာတွေလည်း ထည့်သွင်းပြုလုပ်ခဲ့ပါတယ်။
နိုဝင်ဘာ ၂၅ ရက်မှ ဒီဇင်ဘာ ၁၀ ရက်အတွင်း အမျိုးသမီးများ အပေါ် အကြမ်းဖက်မှုပပျောက်ရေး ၁၆ ရက်တာလှုပ်ရှားမှုကို ကမ္ဘာ့တဝန်း နိုင်ငံအသီးသီးမှာ ကျင်းပနေကြတာဖြစ်ပါတယ်။
