ဧရာဝတီတိုင်း၊ ရေကြည်မြို့နယ်မှာ နိုဝင်ဘာလဆန်းပိုင်းကစတင်ကာ အာဏာသိမ်းစစ်ကောင်စီက ဒေသခံပြည်သူတွေရဲ့ နေအိမ်တွေကို လိုက်လံချိပ်ပိတ်နေပြီး နိုဝင်ဘာလ ၆ ရက်နေ့ထိ စာရင်းတွေအရ နေအိမ် ၇ လုံး ရှိပြီလို့ သိရပါတယ်။
ရေကြည်မြို့ပေါ်ရပ်ကွက်နဲ့ ဇရပ်လှကျေးရွာတွေမှာ ရှိတဲ့ နေအိမ် ၇ လုံးကို ဗုံးဖောက်ကွဲမှု၊ အကြမ်းဖက်ရာမှာ ပါဝင်မှု စတဲ့ စွပ်စွဲချက်တွေနဲ့ နေအိမ်ပိုင်ရှင်တွေကို ဖမ်းဆီးပြီး အိမ်တွေကို ချိပ်ပိတ်ခဲ့တာလို့ ဒေသခံတွေက ပြောပါတယ်။
“အဲ့နေအိမ် ၇ လုံးကို ချိပ်ပိတ်တာဟုတ်တယ်၊ ဒါပေမယ့် အဲ့အထဲမှာ ၅၀၅ နဲ့ထောင်ကျပြီး သိပ်မကြာခင်က ပြန်လွတ်လာတဲ့ ကိုစည်သူကိုပါ ဖမ်းသွားတာ။ ကိုမျိုးမင်းသန်းက သူ့အိမ်မှာ ဗုံးကွဲဖူးတယ်၊ ပါဆယ်လာပို့တာကို ဖွင့်ရင်းနဲ့ ကွဲတာ၊ အဲ့တာလည်း ချိပ်ပိတ်ခံရတယ်” လို့ ဒေသခံတဦးက ပြောပါတယ်။
နေအိမ် ၇ လုံးကို ချိပ်ပိတ်ပြီး ပိုင်ရှင်တွေကို ဖမ်းတဲ့အချိန်မှာ ၅၀၅ နဲ့တရားစွဲထောင်ချခံရပြီး ပြန်လွတ်လာတဲ့ ကိုစည်သူနဲ့ ဇရပ်လှ ကျေးရွာက ကိုမျိုးမင်းသန်းတို့သာ ဖမ်းဆီးခဲ့ရပြီး ကျန်တဲ့သူတွေကတော့ ရှောင်တိမ်းနိုင်ခဲ့တယ်လို့ ဆိုပါတယ်။
ဧရာဝတီတိုင်းမှာ အာဏာသိမ်းစစ်ကောင်စီက ဒေသခံပြည်သူတွေရဲ့ နေအိမ်တွေကို လိုက်လံချိပ်ပိတ်တဲ့ အထဲမှာ ရေကြည်မြို့နယ်က အများဆုံးဖြစ်နေပြီး ကျုံပျော်မြို့နယ်မှာတော့ ဧရာဝတီတိုင်းဝန်ကြီးချုပ်ဟောင်း ဦးမန်ဂျော်နီရဲ့ နေအိမ်လည်း ချိပ်ပိတ်ခံခဲ့ရတယ်လို့ သိရပါတယ်။
