ပခုက္ကူမြို့အနောက်ဘုန်းကန်ကျေးရွာက စစ်တပ်သတင်းပေး ပျူစောထီးခေါင်းဆောင်တစ်ဦးရဲ့ မိသားစု အသတ်ခံရတယ်လို့ ကျေးရွာဒေသခံတွေဆီက သိရပါတယ်။

စစ်တပ်သတင်းပေး ပျူစောထီးခေါင်းဆောင်ဖြစ်တဲ့ အနောက်ဘုန်းကန်ကျေးရွာအုပ်ချုပ်ရေးမှူး ဦးမင်းဇော်ဦးရဲ့  ဇနီးနဲ့ ဖခင်ဖြစ်သူတို့ကို အောက်တိုဘာ ၂၉ ရက်နေ့ ညနေ ၃ နာရီခွဲ ဝန်ကျင်လောက်က သေနတ်နဲ့ ပစ်သတ်ခဲ့တာလို့ ပခုက္ကူ PDF က ထုတ်ပြန်ကြေညာထားပါတယ်။

ဦးမင်းဇော်ဦးကတော့ ထိခိုက်ဒဏ်ရာနဲ့ ထွက်ပြေးလွတ်မြောက်သွားတယ်လို့ ပခုက္ကူ PDF က အတည်ပြုပြောပါတယ်။

ကျေးရွာဒေသခံတစ်ဦးက “ဖခင်ဖြစ်သူသေသွားတယ်၊ ဦးမင်းဇော်ဦးကတော့ မသေဘူး ထွက်ပြေးတယ်၊ အနောက် ဘုန်းကန်ရွာမှာဖြစ်တာပါ။ ညနေ ၃ နာရီခွဲလောက်က သေနတ်နဲ့ပစ်ခံရတာ၊ အခု စစ်ကား ၄ စီးနဲ့ တစ်ရွာလုံးကို ပတ်ရှာနေတာ တရွာလုံးက လူတွေလည်း ထွက်ပြေးနေကြတာ။ ဒလန်ကောင်ကတော့ ဒဏ်ရာနဲ့ လွတ်သွားတယ်” လို့ ပြောပါတယ်။

ပခုက္ကူမြို့နယ်အတွင်း တခြားကျန်ရှိနေတဲ့ ပျူစောထီးတွေ စစ်ကောင်စီလက်အောက်ခံ အုပ်ချုပ်ရေးမှူးတွေအနေနဲ့ မိမိတို့လုပ်ရပ်တွေကို အမြန်ဆုံးရပ်တန့်ဖို့နဲ့ ပြည်သူနဲ့အတူ ပူးပေါင်းဆောင်ရွက်ကြဖို့ ပခုက္ကူ PDF က  တိုက်တွန်းထားပါတယ်။ 

ဆက်လက် ပါဝင်ပတ်သက်ပါက ရှင်းလင်းသုတ်သင်တာတွေကို ဆောင်ရွက်သွားမယ်လို့ ပခုက္ကူ PDF  သတင်းပြန်ကြားရေးနဲ့ပြင်ပဆက်ဆံရေးတာဝန်ခံက ပြောပါတယ်။