ရန်ကုန်၊ ဗိုလ်တထောင်မြို့နယ်မှာ ဖြစ်ပွားခဲ့တဲ့ KBZ ဘဏ်ခွဲ ဓားပြတိုက်မှုမှာ ပါဝင်သူတွေကို လက်နက်၊ ခဲယမ်းတွေနဲ့အတူ ဖမ်းဆီးရမိတယ်လို့ ဒီနေ့ အောက်တိုဘာ ၂၈ ရက်ထုတ် စစ်ကောင်စီ အာဘော် သတင်းစာတွေမှာ ဖော်ပြပါတယ်။
ဗိုလ်တထောင်မြို့နယ်၊ ၄၈ လမ်း၊ အလယ်ဘလောက်ရှိ ကမ္ဘောဇဘဏ်ခွဲမှာ အောက်တိုဘာ ၂၂ ရက် က Mask တပ်ဆင်ထားတဲ့ အမျိုးသား ၄ ယောက်က ဘဏ်လုံခြုံရေးဝန်ထမ်းကို သေနတ်နဲ့ချိန်ပြီး ဘဏ်အတွင်းမှာ အသင့်စောင့်နေတဲ့ အမျိုးသား ၁ ဦးနဲ့ ပူးပေါင်းကာ ငွေကျပ်သိန်း ၃,၀၀၀ ကျော်နဲ့ ဖုန်း ၅ လုံး ယူဆောင် ဓားပြတိုက်သွားခဲ့တာပါ။
အဆိုပါဘဏ်ဓားပြတိုက်မှုဖြစ်စဉ်နဲ့ပတ်သက်ပြီး တရားခံ ကျား ၁၁ ဦး၊ မ ၁ ဦး၊ ပေါင်း ၁၂ ဦး၊ ဓားပြတိုက်ရာမှာ အသုံပြုတဲ့ CZ 75 D အမျိုးအစား ပစ္စတို ၁ လက်၊ ကျည်အိမ် ၁ ခု၊ ကျည် ၃ တောင့်၊ လက်လုပ်မိုင်း ၃ လုံး၊ မော်တော်ယာဉ် ၂ စီး၊ လိုင်စင်မဲ့မော်တော် ဆိုင်ကယ် ၂ စီးနဲ့အတူ ဓားပြတိုက်ယူဆောင်သွားခဲ့တဲ့ ငွေကျပ် ၂,၈၁၄ သိန်းကို ပြန်လည်သိမ်းဆည်းရမိခဲ့တယ်လို့ ဆိုပါတယ်။
အဆိုပါ ဓားပြတိုက်မှုဖြစ်စဉ်နဲ့ ပတ်သက်ပြီး စုံစမ်းဖော်ထုတ်ရာမှာ အောက်တိုဘာ ၂၂ ရက် ညနေ ၃ နာရီ မိနစ် ၄၀ လောက်မှာ ဓားပြတိုက်ရာမှာ အသုံးပြုတဲ့ FF/6532 Fielder (အဖြူရောင်) ယာဉ်မောင်းဖြစ်သူ ဝင်းမော်ဦး (၄၃)နှစ်ကို ဒဂုံဆိပ်ကမ်းမြို့နယ်၊ ၁၆-လမ်းထိပ်မှာ ကားငှားရမ်းခ ရရှိငွေ ၂ သိန်း ကျပ်နဲ့အတူ စတင်ဖမ်းဆီးရမိခဲ့ပြီးနောက် ဆက်စပ်တရားခံတွေကို ဖော်ထုတ်နိုင်ခဲ့တာလို့ သိရပါတယ်။
ဖမ်းဆီးရမိတရားခံတွေထဲမှာ ဟန်ဝင်းထွဋ် နဲ့ ဒိုပေါက်(ခ)အောင်ဟိန်းတို့ဟာ KNLA တပ်မဟာ ၇ မှာ အကြမ်းဖက်ဖောက်ခွဲရေးသင်တန်းအား တက်ရောက်ခဲ့သူဖြစ်ပြီး ဓားပြတိုက်ရာမှာ ရရှိတဲ့ငွေ တစ်ဝက်လောက်ကို ရန်ကုန်ရှိ PDF အဖွဲ့တွေအတွက် ထောက်ပံ့ပေးသွားဖို့ ဖြစ်တယ်လို့ စစ်ကောင်စီ သတင်းစာမှာ စွပ်စွဲဖော်ပြပါတယ်။
စစ်ကောင်စီသတင်းထုတ်ပြန်ချက်မှာ စွပ်စွဲချက်တွေနဲ့ ပတ်သက်ပြီး ဖမ်းဆီးခံရသူတွေဘက် တုံ့ပြန်နိုင်ခြင်းမရှိသလို သတင်းစာပါ အချက်အလက်တွေမှန်ကန်မှုရှိမရှိ ဒီဗွီဘီက သီးခြားအတည်ပြုနိုင် ခြင်း မရှိသေးပါဘူး။
