မန္တလေး ကညနရုံး ဗုံးပေါက်ကွဲ၊ ၄ ဦးထက်မနည်း ဒဏ်ရာရ
DVB
·
September 27, 2021
မန္တလေးမြို့ သိပ္ပံလမ်းပေါ်ရှိ ကညန (မန္တလေးတိုင်း) ရုံးအတွင်းမှာ စက်တင်ဘာ ၂၇ ရက် မနက် ၁၀ နာရီကျော်က လက်လုပ်ဗုံးပေါက်ကွဲခဲ့ပြီး လူ ၄ ဦး ထက်မနည်း ထိခိုက်ဒဏ်ရာ ရခဲ့တယ်လို့ သိရပါတယ်။
ဒဏ်ရာရသူတွေဟာ ကညနမှာ ယာဉ်လိုင်စင်၊ လူလိုင်စင် သက်တမ်းတိုးလာသူတွေနဲ့ သက်တမ်းတိုး ဝန်ဆောင်မှုတွေပေးတဲ့ ပွဲစားတွေဖြစ်တယ်လို့ အနီးပတ်ဝန်းကျင်ရှိ ပြည်သူတချို့ က ပြောပါတယ်။
အနီးပတ်ဝန်းကျင်ရှိ ပြည်သူတစ်ဦးက “ထိခိုက်တာတော့ လူ လေးငါးယောက်တော့ရှိတယ်။ အမျိုးသမီးတွေလည်း ပါတယ်။ ဒဏ်ရာပြင်းပြင်းထန်ထန်ရတာတော့ မတွေ့မိဘူး။” လို့ ပြောတယ်။
ဗုံးပေါက်ပြီးနောက်မှာ အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေရောက်လာပြီး ကညနရုံး အနီးပတ်ဝန်းကျင်မှာ စစ်ဆေးတာ၊ ပိတ်ဆို့ရှာဖွေတာတွေရှိတယ်လို့ သိရပါတယ်။
