ထိုင်းတောင်ပိုင်း ရနောင်းခရိုင်ထဲကနေ မြန်မာ့ရေပိုင်နက်ထဲ နယ်မြေကျွံဝင်ရောက်သွားတဲ့ ထိုင်းခရီးသွားစက်လှေတစ်စီးကို မြန်မာအာဏာပိုင်တွေက တစ်နှစ်ကျော် ထိန်းသိမ်းထားရာက စက်တင်ဘာ ၂၂ ရက်ဒီကနေ့ မနက်မှာတော့  ထိုင်းအာဏာပိုင်လက်ထဲကို ပြန်လည်အပ်နှင်းလိုက်ပါတယ်။

Polaris One အမည်ရှိ အဆိုပါစက်လှေ ပြန်လည်အပ်နှံပွဲကို  ကော့သောင်းမြို့ နယ်စပ်ဂိတ်မှာ ကျင်းပပြီး ထိုင်းဘက်က ရနောင်းခရိုင်ရေကြောင်းတပ်၊ ခရိုင်အမျိုးသားလုံခြုံရေး၊ တိုင်းဒေသ ၆ ရဲတပ်ဖွဲ့စတဲ့ ဌာနဆိုင်ရာတာဝန်ရှိသူတွေ၊ ခရိုင်ခရီးသွားလုပ်ငန်း ဥက္ကဋ္ဌက လာရောက်လက်ခံရယူခဲ့ ပါတယ်။ 

မြန်မာဘက်ခြမ်းအာဏာပိုင်တွေကလည်း ထိုင်း-မြန်မာနှစ်နိုင်ငံ ရေရှည်ဆက်ဆံရေးကောင်း မွန်ဖို့အတွက် အခုလိုပြန်လည်လွှဲပြောင်းပေးအပ်တာလို့ ပြောဆိုပါတယ်။ 

ထိုင်းဘက်ခြမ်း တာဝန်ရှိသူတွေကတော့ ရနောင်းနဲ့ ကော့သောင်းဟာ နယ်နိမိတ်ချင်း ထိစပ်နေပြီး နှစ်ဘက်ပြည်သူတွေချင်းလည်း နီးကပ်ရင်းနှီးကာ စီးပွားရေး၊ လူမှုရေးတွေမှာ တဘက်နဲ့တဘက် အမှီသဟဲပြုနေကြကြောင်း၊  မြန်မာဘက်ကျွံဝင်သွားတဲ့လှေ ကောင်းမွန်စွာ ပြန်လည်ရရှိတဲ့အတွက် ကျေးဇူးတင်ကြောင်း ပြောခဲ့ပါတယ်။ 

Polaris One အမည်ရှိ စက်လှေဟာ ပြီးခဲ့တဲ့နှစ် မေလ ၈ ရက်က ကမ္ဘာလှည့်ခရီးသည်တွေပါ တင်ဆောင်ပြီး ပင်လယ်ထဲလည်ပတ်နေစဉ် မြန်မာ့ရေပိုင်နက်ထဲကျွံဝင်သွားလို့ မြန်မာအာဏာပိုင် တွေက ဖမ်းဆီးထိန်းသိမ်းထားခဲ့တာပါ။

လှေပေါ်မှာ ထိုင်းလူမျိုးရော နိုင်ငံခြားသားတွေပါ ၂၄ ဦး လိုက်ပါသွားပြီး  ထိုင်းအာဏာပိုင်နဲ့ သက်ဆိုင်ရာမိသားစုဝင်တွေက တောင်းဆိုတဲ့အတွက် ပြီးခဲ့တဲ့ ၂၀၂၀  ဒီဇင်ဘာ ၁၅ ရက်နေ့မှာ လူ အယောက် ၂၀ ဦး ၊ ၂၀၂၁ ဇန်နဝါရီ ၈ ရက်နေ့မှာ ၄ ယောက် အသီးသီးပြန်လွှတ်ပေးခဲ့ပါတယ်။ 

သူတို့စီးလာတဲ့စက်လှေကိုတော့ ဒီကနေ့မနက်ပိုင်းမှာမှ ပြန်လည်လွှဲပြောင်းပေးအပ်လိုက်တာ ဖြစ်ပါတယ်။ 

ကိုးကား - ရနောင်းဒေသတွင်းသတင်း