မကွေးတိုင်းဒေသကြီး ဂန့်ဂေါမြို့နယ်နဲ့ စစ်ကိုင်းတိုင်း ကလေးမြို့နယ်အစပ်မှာ စက်တင်ဘာ ၁၅ ရက်နေ့မနက်ပိုင်းက YDF တပ်ဖွဲ့နဲ့ အကြမ်းဖက်စစ်အုပ်စုတွေ တိုက်ပွဲ ဖြစ်ပွားရာ စစ်ကောင်စီဘက်က ၄ ယောက်သေဆုံးပြီး ၂ ယောက် အပြင်းထန်ဒဏ်ရာရသွားတယ်လို့ YDF က ထုတ်ပြန်ပါတယ်။
ဂန့်ဂေါမြို့နယ်နဲ့ကလေးမြို့နယ်အစပ်က ကျောက်ပြုတ်ကျေးရွာ တောင်ဘက်မှာ စက်တင်ဘာ ၁၅ ရက် မနက် ၈ နာရီလောက်က YDF တပ်ဖွဲ့နဲ စစ်ကောင်စီတပ်တွေ အနီးကပ်တိုက်ပွဲ ဖြစ်ပွားခဲ့တာလို့ ဆိုပါတယ်။
အကြမ်းဖက်စစ်အုပ်စုဘက်က သေဆုံးတဲ့သူ ၄ ယောက်အနက် ၂ ယောက်ဟာ စစ်တပ် ယူနီဖောင်းတွေဝတ်ထားတဲ့ ပျူစောထီးတွေလို့ ဖော်ပြထားပါတယ်။
အကြမ်းဖက်စစ်အုပ်စုဘက်က လက်နက်ကြီးတွေနဲ့ ပစ်ခတ်တိုက်ခိုက်ပေမယ့် ယောဒေသကာကွယ်ရေးတပ်ဖွဲ့ YDF ဘက်က အထိအခိုက် အကျဆုံးမရှိဘဲ အောင်အောင်မြင်မြင် ဆုတ်ခွာနိုင်ခဲ့တယ်လို့ ဆိုပါတယ်။
နှစ်ဖက်တိုက်ပွဲအတွင်း စစ်ကောင်စီတပ်ဘက်က သေဆုံးဒဏ်ရာရမှုအခြေအနေနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။
