မန္တလေးက အောင်မြေသာစံ ပညာရေးကျောင်းပေါင်းစုံ သပိတ်စစ်ကြောင်း ပစ်ခတ်ဖြိုခွင်းခံရ
DVB
·
September 15, 2021
စစ်အာဏာရှင်စနစ်ပြုတ်ကျရေးအတွက် နေ့စဉ်ချီတက်နေတဲ့ မန္တလေးမြို့က အောင်မြေသာစံ ပညာရေးကျောင်းပေါင်းစုံ သပိတ်စစ်ကြောင်းဟာ စက်တင်ဘာ ၁၅ ရက် မနက်ပိုင်းက ပစ်ခတ်ဖြိုခွင်းခံခဲ့ရပါတယ်။
အောင်မြေသာစံမြို့နယ် ၈၁ လမ်း၊ ၁၄ လမ်း နဲ့ ၁၅ လမ်းကြားမှာ အောင်မြေသာစံ ပညာရေးကျောင်းပေါင်းစုံ သပိတ်စစ်ကြောင်း ချီတက်ဖို့ ပြင်စဉ်နေတဲ့အချိန် စစ်ကောင်စီ တပ်သားတွေရဲ့ လှည့်ကင်းနဲ့ ထိပ်တိုက်တွေ့ခဲ့တာလို့ သိရပါတယ်။
စစ်ကြောင်းမှာပါဝင်သူတဦးက “စစ်ကြောင်းချီတက်ဖို့ လုပ်နေတဲ့အချိန် လှည့်ကင်းနဲ့တွေ့ တိုးတဲ့ပုံစံ။ ကျနော်တို့က တပြကျော်ကျော်လောက်က လှမ်းမြင်နေရတာဆိုတော့ အချိန်မီ လူစုခွဲနိုင်ခဲ့တယ်။ သူတို့ဘက်က သေနတ်တွေနဲ့ ပစ်တာရှိတယ်” လို့ ပြောပါတယ်။
အဲ့ဒီလို အချိန်မီလူစုခွဲနိုင်ခဲ့တဲ့အတွက် စစ်ကြောင်းမှာပါတဲ့သူတွေ ဖမ်းဆီးခံရတာနဲ့ ထိခိုက်ဒဏ်ရာရတာ မရှိခဲ့ဘူးလို့ သိရပါတယ်။
