ရေဦးမြို့နယ်အတွင်းက မိုင်တဲလ်တာဝါတိုင်နှစ်ခု ဖျက်ဆီးခံရ
DVB
·
September 10, 2021
စစ်ကိုင်းတိုင်းဒေသကြီး၊ ရေဦးမြိုနယ်အတွင်းက မိုင်တဲလ်တာဝါတိုင်နှစ်ခု စက်တင်ဘာ ၉ ရက်နေ့ည ၉ နာရီလောက်က တပြိုင်တည်း ဖျက်ဆီးခံခဲ့ရတယ်လို့ ဒေသခံတွေက ပြောပါတယ်။
ရေဦးမြို့နယ် အင်တောအုပ်စု ဆပ်သေကျေးရွာ နဲ့ ဝသဲအုပ်စု မီးမောင်းကုန်းကျေးရွာရှိ မိုင်တဲလ်တာဝါတိုင် နှစ်ခု ဖျက်ဆီးခံရတာလို့ ဆိုပါတယ်။
ဒေသခံတဦးက “ဘယ်အဖွဲ့အစည်းကမှန်းလည်းမသိဘူး။ ဒေသခံတွေကတော့ မဟုတ်ဘူးဆိုတာကတော့ သေချာတယ်။ သူတိုစကားပြောသံတွေကြားရတယ်။ ကိုယ်ရွာသားတွေဆိုရင် ရုပ်မမြင်ရတောင် အသံကြားရတာနဲ့ ဒီအသံ ဘယ်သူဖြစ်နိုင်တယ်ဆိုတာ မှန်းလို့ရတယ်လေ။ အခုဟာကတော့ သိလည်းမသိဘူး။ သွားလည်းမကြည့်ရဲဘူး။ ဒီလိုအဖျက်ဆီးခံရလို့ စစ်ကောင်စီတပ်တွေလာပြီး ကျနော်တို့ဒေသခံတွေ ဖမ်းဆီးနှိပ်ဆက်ခံရမှာတော့ ကြောက်တာပေါ့ဗျာ။ ဒီစစ်ကောင်စီတပ်တွေက ယုံရတာမဟုတ်ဘူး” လို့ ဒေသခံတစ်ဦးကပြောပါတယ်။
