ရန်ကုန်တိုင်း၊ မရမ်းကုန်းမြို့နယ်၊ ၁ ရပ်ကွက်အတွင်း သြဂုတ် ၂၃ ရက်မနက်ပိုင်းက စစ်ကောင်စီတပ်အင်အားအလုံးအရင်းနဲ့ တိုက်ခန်းတခုအား ဝင်ရောက်စီးနင်းခဲ့ပြီး လူငယ် ၄ ဦးထက်မနည်း ဖမ်းဆီးခံလိုက်ရတယ်လို့ ရပ်ကွက်နေပြည်သူအချို့ဆီက သိရပါတယ်။
မနက် ၈ နာရီခွဲလောက်မှာ စစ်ကောင်စီတပ်က ဝင်ရောက်စီးနင်းခဲ့တာဖြစ်ပြီး အပြန်လှန်ပစ်ခတ်တာတွေလည်း ရှိခဲ့တယ်လို့ ရပ်ကွက်နေပြည်သူတဦးက ပြောပါတယ်။
“ပစ်တာတော့ ဆက်တိုက်ပဲ၊ အပေါ်အောက်ပစ်ကြတာ။ လူငယ် ၄၊ ၅ ဦးလောက်ကို စစ်ကားပေါ်တင်ပြီး ဖမ်းခေါ်သွားတယ်။ ၉ နာရီကျော်လောက်မှာ ပစ်သံတွေရပ်သွားတယ်။ ၁၁ နာရီလောက်အထိ လမ်းပေါ်ဘယ်သူမှ မထွက်ရဲကြဘူး။ အခုမှ အခြေအနေအေးဆေးသွားလို့ အပြင်ပြန်ထွက်နေပြီ။”
အဆိုပါ မရမ်းကုန်း ၁ ရပ်ကွက်အုပ်ချုပ်ရေးမှူးရုံးမှာ ဗုံးပေါက်ကွဲမူနှစ်ကြိမ်ဖြစ်ပေါ်ခဲ့ဖူးပြီး စစ်ကောင်စီတပ်တွေက လုံခြုံရေးအားဖြည့် စောင့်ကြည့်နေတာ ကြာပြီလို့ ဆိုပါတယ်။
လွန်ခဲ့တဲ့ ၂ ရက်လောက်ကတည်းက ရပ်ကွက်အတွင်း ဝင်ရောက်စီးနင်းမှု လုပ်နိုင်တယ်လို့ သတင်းထွက်ပေါ်နေတာလို့ ဆိုပါတယ်။
ဒီနေ့မနက် ပစ်ခတ်ဖမ်းဆီးတာတွေ လုပ်ပြီးတဲ့နောက် စစ်ကား ၃ စီးက ရပ်ကွက်လမ်းတွေထဲ လှည့်ပတ်မောင်းနေတာ တွေ့ရတယ်လို့လည်း ရပ်ကွက်နေပြည်သူတဦးက ပြောပါတယ်။
အခုဖြစ်စဉ်မှာ ဖမ်းဆီးခံလိုက်ရတဲ့ လူငယ်တွေဟာ ရပ်ကွက်ထဲက လူငယ်တွေမဟုတ်ဘူးလို့ ပြောကြားတာတွေ ရှိပေမယ့် ဒီဗွီဘီက သီးခြားအတည်မပြုနိုင်သေးပါဘူး။
