မကွေးတိုင်းဒေသကြီး ပခုက္ကူခရိုင် မြစ်ခြေမြို့ တိုးချဲ့၁ ရပ်ကွက်တခုလုံးကို အလှူရှင်တစ်ဦးက အခြေခံစားသောက်ကုန်တွေ သြဂုတ် ၂ ရက်နေ့မနက်ပိုင်းမှာ ထောက်ပံ့လှူဒါန်းခဲ့တယ်လို့ ဒေသခံတွေဆီကနေ သိရပါတယ်။
တိုးချဲ့၁ ရပ်ကွက်မှာ အိမ်ခြေ ၃၀၀ လောက်ရှိပြီး အလှူရှင်ဟာ တစ်အိမ်ကို ဆန် ၂ ပြည်နဲ့ ဆီတစ်ဘူးစီ ကိုဗစ်ရောဂါကာကွယ်ရေး အစီမံတွေနဲ့ အိမ်တိုင်ရာရောက် လိုက်လံလှူဒါန်းခဲ့တာလို့ မြို့ခံတစ်ယောက်က ပြောပါတယ်။
အခုလို ကိုဗစ်ကပ်ရောဂါ ဖြစ်ပွားနေတဲ့ ကာလမှာ ပြည်သူတွေရဲ့ အခက်အခဲတွေကို ကူညီထောက်ပံ့ပေးတဲ့ အလှူရှင်မိသားစုကို ကျေးဇူးတင်သလို ပြည့်စုံတဲ့သူတွေက ပြည်သူတွေကို ပြန်လည်ထောက်ပံ့တာဟာ မြန်မာလူမျိုးတွေရဲ့ ကောင်းမွန်တဲ့ အစဥ်အလာတခုဖြစ်တယ်လို့ ဆိုပါတယ်။
ပြည်သူတွေမှာ ပြည်သူအချင်းချင်းပဲ အားကိုးစရာရှိတာကြောင့် ဘယ်အရပ်ဒေသမှာမဆို ပြည့်စုံကြွယ်ဝတဲ့သူတွေက ဆင်ရဲနွမ်းပါးတဲ့ ပြည်သူတွေကို ပြန်လည်ထောက်ပံ့ပေးမှသာ ဒီကပ်ရောဂါဆိုးကို အောင်အောင်မြင်မြင် ကျော်လွှားနိုင်မယ်လို့ ဆိုပါတယ်။
