တောင်တွင်းကြီးမြို့မှာ စျေးဝယ်ကတ်လို့ခေါ်တဲ့ ဝင်ထွက်ခွင့်ကတ်တွေကို သက်ဆိုင်ရာ ရပ်ကျေးအုပ်ချုပ်ရေးမှူးရုံးတွေက ထုတ်ပေးရာမှာ ငွေကြေးကောက်ခံမှုအချို့ ရှိနေတယ်လို့ ဒေသခံတွေဆီက သိရပါတယ်။
တောင်တွင်းကြီးမြို့နယ်၊ ခင်တဲကျေးရွာနေ ပြည်သူတစ်ဦးက ''အုပ်ချုပ်ရေးမှူးရုံးကို ဝင်ထွက်ကတ် သွားယူတာ လူတွေများ ပုံလို့ အလှူပေးနေသလားပဲ။ ရောဂါပိုးက အဲဒီကနေကို ကူးကုန်လောက်ပြီ။ တအိမ်ကို ၁ ရွက်ပေးပြီး စရိတ်တဲ့ ၅၀၀ ပေးရတယ်။ တချို့အိမ်တွေဆိုရင် ၂ ရွက် ၃ ရွက်ရကြတယ်။ စစ်ကောင်စီကခန့်တဲ့သူတွေဆိုတော့ လုပ်ချင်တာလုပ်နေကြတာဗျာ။ ပြည်သူတွေ ဒုက္ခရောက်နေတဲ့ကာလကြီးကို ပူပူမှုတ်စားချင်ကြသေးတယ်” လို့ ပြောပါတယ်။
တောင်တွင်းကြီးမြို့နယ်ထဲ တချို့ကျေးရွာတွေမှာ ဝင်ထွက်ခွင့်ကတ် ၁ ရွက်ကို ၁၀၀၀ အထိပေးရကြောင်းနဲ့ မြို့ဝင်ထွက်ဂိတ်တွေမှာ စောင့်တဲ့ စစ်သားနဲ့ ရဲတွေကလည်း ကားသမားတွေဆီကနေ ငွေတောင်းခံမှုတွေ ရှိနေတယ်လို့ ဒေသခံပြည်သူတွေဆီက သိရပါတယ်။
