မွန်ပြည်နယ်မှာ အမှုရင်ဆိုင်နေရတဲ့ အချုပ်သား ၁၀၀ ကျော်ကို ဇူလိုင် ၂၂ ရက် ညပိုင်းမှာ ပြန်လွှတ်ပေးခဲ့တယ်လို့ မွန်ပြည်နယ် အကျဉ်းဦးစီးဌာန တာဝန်ရှိသူတစ်ဦးက ဒီဗွီဘီကို ပြောပါတယ်။
ပြန်လွှတ်ပေးခဲ့တဲ့ အချုပ်သား ၁၀၃ ဦးဟာ ခိုးမှု၊ လောင်းကစားမှုနဲ့ မူးယစ်ဆေးဝါးမှုနဲ့ အမှုရင်ဆိုင်နေရတဲ့သူတွေ အများစု ပါဝင်တယ်လို့ ဆိုပါတယ်။
ပြန်လွှတ်ပေးခဲ့တဲ့ အချုပ်သားတွေဟာ မော်လမြိုင်အချုပ်ထောင်၊ ကျိုက်မရောအကျဉ်းထောင်နဲ့ သထုံအချုပ်ထောင်တွေမှာ အမှုရင်ဆိုင်ဖို့ ချုပ်နှောင်ခံထားရသူတွေ ဖြစ်ပါတယ်။
ဒါအပြင် ဒီကနေ့ ဇူလိုင် ၂၃ ရက်နေ့မှာလည်း အချုပ်သားတချို့ကို ပြန်လွှတ်ပေးဖို့ ရှိနေပြီး စာရင်းအတိအကျ မသိရသေးဘူးလို့ ဆိုပါတယ်။
အာဏာမသိမ်းခင်ဖမ်းဆီးတရားစွဲ အမှုရင်ဆိုင်နေရတဲ့ အချုပ်သားတွေကို ကိုဗစ်-၁၉ ကပ်ရောဂါ ကာကွယ်နိုင်ရေးအတွက် သက်ညှာစွာ အမှုပိတ်သိမ်းပေးခဲ့တာ ဖြစ်တယ်လို့ စစ်ကောင်စီက ကြေညာထားပါတယ်။
အာဏာသိမ်းစစ်ကောင်စီဟာ ပြီးခဲ့တဲ့ ဇွန်လ ၃၀ ရက်နေ့က မွန်ပြည်နယ်တစ်ခုလုံးအနေနဲ့ အကျဉ်းသား ၃၀ ကျော်ကို ပြန်လွှတ်ပေးခဲ့ပါတယ်။
