မန္တလေးတိုင်း၊ မိုးကုတ်မြို့မှာ ဇူလိုင် ၁၃ ရက်နေ့က စစ်တပ်အရာရှိဟောင်း အမျိုးသားတစ်ဦး  နေအိမ်မှာ အသတ်ခံလိုက်ရတယ်လို့ ဒေသခံတွေရဲ့ ပြောပြချက်အရ သိရပါတယ်။

အသတ်ခံရသူ ဦးနိုင်မိုး(ခ) ဦးတင်ထွန်းနိုင်ဟာ လွန်ခဲ့တဲ့ နှစ် ၂၀ ကျော်လောက်က  စစ်တပ်မှာ တာဝန်ထမ်းဆောင်ခဲ့တဲ့ အရာရှိတစ်ဦးဖြစ်ပြီး မိုးကုတ်ကို ၂၀၂၀ ပြည့်နှစ်ကမှ  ပြောင်းရွှေ့လာသူ ဖြစ်ပါတယ်။

ဇူလိုင် ၁၃ ရက် နေ့လယ် ၃ နာရီမှာ သူ့ရဲ့ နေအိမ်မှာ သေနတ်နဲ့ ပစ်သတ်ခံလိုက်ရတယ်လို့​ကြားရပြီး နေအိမ်မှာရှိနေသူတွေကိုလည်း လက်ပြန်ကြိုးတုပ်ထားကာ  ဦးနိုင်မိုးကို​ နေအိမ်မှာ သတ်သွားခဲ့တာလို့  မိုးကုတ်ဒေသခံက ပြောပါတယ်။

ဦးနိုင်မိုးကို ဘာကြောင့် ဘယ်သူက သတ်သွားတယ်ဆိုတာကိုတော့ မသိရသေးပါဘူး။ ဦးနိုင်မိုး သေဆုံးပြီးနောက် သူ့ရဲ့ နေအိမ်ဝန်းကျင်မှာ  ရဲတပ်ဖွဲ့ဝင်တွေနဲ့ စစ်သားတွေ လာရောက် စစ်ဆေးနေတယ်လို့ သိရပါတယ်။