ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့မှာ ဇွန်လ ၂၆ ရက်နေ့ မနက်ပိုင်းက ကိုဗစ်-၁၉ လူနာ ၁ ဦး သေဆုံးခဲ့တယ်လို့ သိရပါတယ်။
ငရုတ်ကောင်းမြို့မှာ ပထမဆုံး ကိုဗစ်ရောဂါကူးစက်ခံရတဲ့ အမှတ် ၂ ရပ်ကွက်မှာ နေထိုင်တဲ့ အသက် ၆၄ နှစ်အရွယ် အဘွား သေဆုံးခဲ့တာလို့ ဒေသခံတွေက ပြောပါတယ်။
“အဲဒီအဘွားက ဆီးချို သွေးချို အခံရှိတော့ ပုသိမ်ကို မကြာခဏ ဆေးခန်းသွားပြနေရတယ်။ အဲဒီကနေ ကူးပြီး ဒီမနက် ဆုံးသွားတာ” လို့ ဒေသခံတဦးက ပြောပါတယ်။
ကိုဗစ် ကူးစက်ခံရပြီး သေဆုံးခဲ့တဲ့ အသက် ၆၄ နှစ်အရွယ် အဘွားဟာ ဆီးချို၊ သွေးချိုအခံရှိသူဖြစ်ပြီး ပုသိမ်မြို့ကို ဆေးခန်းလာပြနေရသူဖြစ်ပြီး ကိုဗစ် -၁၉ ရောဂါပိုး ကူးစက်ခံရပြီးနောက် ရက်ပိုင်းအတွင်း သေဆုံးခဲ့တာလို့ ဆိုပါတယ်။
ငရုတ်ကောင်းမြို့ဟာ ကိုဗစ် ပထမလှိုင်းနဲ့ ဒုတိယလှိုင်းမှာ ဧရာဝတီတိုင်းအတွင်း ကိုဗစ် -၁၉ ရောဂါကင်းစင်တဲ့ မြို့တမြို့ဖြစ်ပြီး အခုတွေ့ရှိတဲ့ လူနာမှာ ပထမဆုံး ကိုဗစ်လူနာဖြစ်သလို မြို့အတွင်း ထပ်မံကူးစက်မှာကို ဒေသခံတွေ စိုးရိမ်နေကြပါတယ်။
