ဧရာဝတီတိုင်းဒေသကြီး၊ ဖျာပုံမြို့နယ်မှာ ဇွန်လ ၁၉ ရက် မနက်ပိုင်းက ဗုံး ၃ လုံးဆက်တိုက်ပေါက်ကွဲခဲ့ပါတယ်။
မြို့လည်ခေါင်က ပန်းခြံအတွင်းရှိ ရွှေရတုအရာရှိဧည့်ရိပ်သာနဲ့ မြို့နယ်တရားရုံးအနီးမှာ ဗုံးတစ်လုံး၊ အမှတ် ၇ ရပ်ကွက်၊ နီလာလမ်းနဲ့ ဇေယျဝတီလမ်းထောင့်ရှိ မြို့နယ်အခွန်ဦးစီးဌာနရုံးမှာ ဗုံးတစ်လုံးနဲ့ အမှတ် ၄ ရပ်ကွက်၊ ၂ လမ်းက အမှတ် ၄ အထက်တန်း ကျောင်းနဲ့ တရုတ်ဘုံကျောင်းအနီးမှာ ဗုံးတစ်လုံး မနက် ၈ နာရီလောက်က ဆက်တိုက်ပေါက်ကွဲခဲ့တာလို့ ဒေသခံတွေက ပြောပါတယ်။
"အခွန်ရုံးက CDM လုံးဝ မရှိတဲ့ရုံးပါ။ ဗုံးက ရွှေရတုဧည့်ရိပ်သာနဲ့ တရားရုံးနားမှာ အရင်ပေါက်တယ်။ ပြီးတော့မှ အခွန်ရုံးနဲ့ အမှတ် ၄ ကျောင်းနားမှာ ပေါက်တာ။ လူထိခိုက်ဒဏ်ရာရတာတော့ မကြားမိဘူး။ အခွန်ရုံးကတော့ နည်းနည်းပါးပါး ပျက်စီးတယ်လို့ သိရတယ်"လို့ ဒေသခံ တစ်ဦးက ပြောပါတယ်။
ဗုံးပေါက်ကွဲခဲ့တဲ့နေရာတွေကို လက်နက်ကိုင်တွေက မိနစ်ပိုင်းအတွင်းရောက်လာပြီး လုံခြုံရေးတင်းကျပ်ကာ ပတ်ဝန်းကျင်ကို စစ်ဆေးနေပါတယ်။
ဗုံး ၃ လုံးဆက်တိုက် ပေါက်ကွဲခဲ့ပြီးနောက် မြို့အဝင် ဗိုလ်ချုပ်ကြေးရုပ်အနီးက လက်ဖက်ရည်ဆိုင်တစ်ဆိုင်ရှေ့မှာ မပေါက်ကွဲသေးတဲ့ ဗုံးတစ်လုံး ထပ်မံတွေ့ရှိခဲ့လို့ စစ်တပ်က ယူဆောင်သွားပါတယ်။
