ကချင်ပြည်နယ်၊ ရွှေကူမြို့မှာ ဇွန်လ ၉ ရက် ည ၁၀ နာရီလောက်က သင်္ဘောဆိပ်မှာဆိုက်ကပ်ထားတဲ့ စစ်တပ်ရိက္ခာတင်သင်္ဘော တိုက်ခိုက်ခံခဲ့ရပါတယ်။

ကေအိုင်အေနဲ့ ဒေသခံ ရွှေကူပြည်သူ့ကာကွယ်ရေးတပ်ဖွဲ့(SPDF)တို့ ပူးပေါင်းကာ ဝင်ရောက်စီးနင်း တိုက်ခိုက်ကြလို့ လက်နက်ကြီး လက်နက်ငယ်တွေနဲ့ အပြန်အလှန်ပစ်ခတ်မှုဖြစ်ပေါ်ခဲ့တယ်လို့ ရွှေကူဒေသခံက ပြောပါတယ်။ 

"ဖြစ်တာက ည ၉ နာရီ ၄၅ မိနစ်လောက်ကဖြစ်တာ ပထမက လျှပ်ပြေးဆိပ်ဘက်ကနေ ရွှေကူ PDF နဲ့ KIA က သင်္ဘောကို စပြီးပစ်တယ်လို့သိရတယ်။ အဲဒီသင်္ဘောပေါ်က အစောင့်စစ်သားတွေနဲ့ အပြန်အလှန်ပစ်ခတ်ကြတာ လက်နက်ကြီးသံတွေရော၊ သေနတ်သံတွေရော အရင်တစ်ခါထက် ပိုပြင်းထန်တယ်တိုက်ပွဲက"လို့ပြောပါတယ်။

ပစ်ခတ်မှုတွေ၊ လက်နက်ကြီးနဲ့ စက်သေနတ်သံတွေ​ကြောင့် ပတ်ဝန်းကျင်မှာ နေထိုင်သူတွေ ကြောက်လန့်နေကြတယ်လို့လည်း  သင်္ဘောဆိပ်အနီး နေထိုင်သူ တစ်ယောက်က ပြောပါတယ်။

အဆိုပါပစ်ခတ်တိုက်ခိုက်မှုကြောင့် ထိခိုက်ကျဆုံးမှုအခြေအနေတော့ မသိရသေးပါဘူး။ 

ရွှေကူမြို့ ရဲစခန်းကိုလည်း ပြီးခဲ့တဲ့ ဇွန်လ ၄ ရက်က   ​ရွှေကူ PDF နဲ့ KIA တို့ ပူး​ပေါင်းပြီး တိုက်ခိုက်ခဲ့ပါတယ်။