မြန်မာ-ထိုင်း နယ်စပ် မဲဆောက်-မြဝတီဒေသ ဖလူးကျေးရွာမှာ ဇွန် ၁ ရက်နေ့က ဖြစ်ပွားခဲ့တဲ့ တိုက်ပွဲတွေကြောင့် ထိုင်းနိုင်ငံဘက်ကို ထွက်ပြေးတိမ်းရှောင်ခဲ့ကြတဲ့ မြန်မာနိုင်ငံသားတွေဟာ ဇွန် ၅ ရက်နေ့မှာတော့   မြန်မာနိုင်ငံဘက်ကို ပြန်လာနေကြပါတယ်။

ကရင်လက်နက်ကိုင် DKBA ခွဲထွက်အဖွဲ့နဲ့ စစ်ကောင်စီတပ်တွေရဲ့ နှစ်ရက်ကြာ တိုက်ပွဲကြောင့် ထိုင်းနိုင်ငံ မဲဆောက်ဘက်မှာ အမျိုးသမီး၊ ကလေးငယ်တွေ အပါအဝင်  အယောက်  ၄၀၀ လောက်သွားရောက်  ခိုလှုံခဲ့ကြပါတယ်။

အခုအခါ မြဝတီမြို့တောင်ဘက် ဖလူးကျေးရွာမှာ  တိုက်ပွဲငြိမ်သက်နေပြီး စစ်ပြေးရှောင်ရွာသားတွေ ပြန်လာနေကြပါတယ်။

မြဝတီတောင်ဘက် ဝေါ်လေမြိုင်၊ ကနဲလေးရွာမှာတော့ စစ်ကောင်စီတပ်စခန်းက တပ်သား ၇ ယောက်  ဇွန် ၄ ရက်နေ့က ရေခပ်ဆင်းချိန် ကရင်အမျိုးသားကာကွယ်ရေးတပ် KNDO တပ်ဖွဲ့က ဖမ်းဆီး ခေါ်ဆောင်သွားပါတယ်။

ဝေါ်လေမြိုင်စစ်ကောင်စီတပ်တွေ စစ်ကူလာကြတဲ့ ခရီးလမ်းမှာ KNDO တပ်က စောင့်ပစ်ခဲ့တာကြောင့် စစ်ကောင်စီတပ်က ၃ ဦး ကျဆုံးပြီး နှစ်ဘက် စစ်ရေးတင်းမာနေပါတယ်။