ကနီမြို့နယ် ချင်းတွင်းမြစ်အရှေ့ဘက်ကမ်းက မိုးကောင်းကျေးရွာကို စစ်ကောင်စီတပ် အင်အား ၅၀ လောက်က ဝင်ရောက်ရှာဖွေပြီး ပစ္စည်းတွေ ယူဆောင်တာတွေ ပြုလုပ်နေတာကြောင့် ရွာသားတွေ ထွက်ပြေးတိမ်းရှောင်နေရတယ်လို့ မိုးကောင်းဒေသခံတွေက ပြောပါတယ်။
မိုးကောင်းကျေးရွာနေ ပြည်တစ်ဦးက "ရွာကိုမနက် (၆) နာရီလောက်က ဝင်တယ်။ အယောက် ၅၀ ရှိတယ်။ စစ်ဝတ်စုံနဲ့က (၂၀) ၊ အရပ်ဝတ်နဲ့က အယောက်(၃၀)ပါ။ ဆိုင်ကယ်တွေနဲ့လာတာ။ ပထမ မိုးကောင်းအနောက်ရွာကိုမွှေတယ်။ အဲရွာပြီးတာနဲ့ မိုးကောင်းအရှေ့ရွာက ရွာဦးဘုန်းတော်ကြီးထံ တပ်စွဲဖို့ လာလျှောက်တာ ဘုန်းကြီးကလက်မခံဘူး။ အဲလိုလက်မခံလို့ ရွာထဲက အိမ်တွေထဲမွှေနောက်နေတယ်။ ရွာသားတွေရဲ့ပစ္စည်းတွေယူ၊ ဈေးဆိုင်တွေက ဘီယာတွေယူ၊ ကြက်တွေချက်သောက်စားနေကြတယ်။ ရွာကလူတွေကတော့ ဘေးလွတ်ရာကို ထွက်ပြေးနေရတယ်” လို့ ပြောပါတယ်။
အကြမ်းဖက်စစ်ကောင်စီရဲ့ တပ်တွေဟာ ကျေးရွာတွေက အဖိုးတန်ပစ္စည်းတွေ ခိုးယူ၊ ကြက်၊ ဝက်နဲ့ အစားအစာတွေ သတ်စားကြတာ လုပ်ဆောင်နေကြတာကြောင့် ကနီမြို့နယ်အတွင်း အချို့ကျေးရွာတွေက ရွာလုံးကျွတ် ထွက်ပြေးတိမ်းရှောင်နေကြရတာလို့ ဆိုပါတယ်။
ကျေးရွာနေအိမ်တွေမှာ ပြန်လည်နေထိုင်မယ်ဆိုပါက အကြမ်းဖက်စစ်အုပ်စုရဲ့ သတ်ဖြတ်မဲ့အန္တရာယ်ရှိလို့ စိုးရိမ်ကြောင်ရွံ့ပြီး နေအိမ်တွေကို စွန်ခွာထွက်ပြေးနေကြရတာပါ။
ဒါ့အပြင် ဒေသခံပြည်သူတွေရဲ့ ခရီးသွားတာနဲ့ ကုန်စည်စီးဆင်း သယ်ယူတာတွေကိုလည်း အကြမ်းဖက်စစ်ကောင်စီအဖွဲ့က စစ်ဆေးတာပြုလုပ်ပြီး ဖမ်းဆီးတာ၊ သတ်ပြီးမှ အလောင်းလာယူဖို့ အကြောင်းကြားတာမျိုးတွေလည်းရှိနေတယ်လို့ သိရပါတယ်။
