ကချင်ပြည်နယ်၊ ဗန်းမော်ခရိုင်၊ မံစီမြို့နယ်အတွင်း မေလ ၁၈ ရက်က ကေအိုင်အေ စခန်းရှိရာသို့ စစ်ကောင်စီတပ်တွေက တိုက်လေယာဉ်တွေနဲ့ မကြာခဏ လာရောက်ပစ်ခတ်နေပြီး ဒဂေါ်၊ မဒန်ယန်ဘက်မှာ လက်နက်ကြီးသံတွေ မကြာခဏကြားနေရတယ်လို့ ဒေသခံတွေက ပြောပါတယ်။
မံစီမြို့နယ်အတွင်း မေလဆန်းပိုင်း စတင်ပြီး ကချင်ပြည်သူ့လွတ်မြောက်ရေးတပ်မတော် (ကေအိုင်အေ) နဲ့ အာဏာသိမ်းစစ်ကောင်စီတပ်တွေ မကြာခဏ ထိတွေ့တိုက်ပွဲဖြစ်ပွားနေပါတယ်။
တိုက်ပွဲတွေကြောင့် ဒေသခံတွေ စိုးရိမ်နေကြရပြီး ရွာတချို့မှ ဒေသခံပြည်သူတွေ စစ်ရှောင်စခန်းတွေကို ပြန်လည်ဝင်ရောက်နေကြတယ်လို့ သိရပါတယ်။
မံစီမြို့၊ ကျော်ခေါင်ရွာ၊ မံဖွရွာနဲ့ တိုက်ပွဲဖြစ်ပွားရာနေရာ အလွန်နီးကပ်နေတာကြောင့် မြို့ပေါ်ရပ်ကွက်နဲ့ ရွာဘက်က ဒေသခံတချို့လည်း ထွက်ပြေးတိမ်းရှောင်နေကြရပြီး အခက်အခဲတွေ ဖြစ်ပေါ်နေပါတယ်။
မေလ ၁၇ နေ့ညပိုင်းကလည်း ဟန်ထက်လမ်း ကုန်းတိန်ရွာအနီးမှာလည်း ပစ်ခတ်သံတွေ ကြားရပြီး ရီခူးမံခံကျေးရွာနားမှာလည်း စစ်တပ်က တင်းကျပ် စစ်ဆေးနေပါတယ်။
မံစီမြို့နယ်ဟာ ရှမ်းပြည်မြောက်ပိုင်းနဲ့ ထိစပ်နေပြီး မူဆယ်-နမ့်ခမ်းသို့ သွားတဲ့ လမ်းမကြီး တည်ရှိနေပေမဲ့ ၂၀၁၁ ခုနှစ်မှာ တကြော့ပြန်စစ်ပွဲတွေကြောင့် လမ်းပိတ်ထားရဆဲဖြစ်ပြီး အခုအချိန်မှာ မံစီမြို့နယ် နေရာအနှံ့အပြားနဲ့ ရှမ်းပြည်နယ်စပ်တွေမှာ ကေအိုင်အေနဲ့ အာဏာသိမ်း စစ်ကောင်စီတပ်တွေ တိုက်ပွဲတွေဖြစ်ပွားနေပါတယ်။
