မကွေးတိုင်း၊ ဂန့်ဂေါမြို့နယ်၊ ဂန့်ဂေါ-ကလေးကားလမ်း၊ တောင်ခင်ရန်းရွာအနီး အာဏာသိမ်းစစ်ကောင်စီရဲ့ အကြမ်းဖက်တပ်တွေနဲ့ တူမီးသေနတ်ကိုင်ဆောင်ထားသူတွေ ဒီမနက်က တိုက်ပွဲငယ် ဖြစ်ပွားခဲ့ပါတယ်။ 

အချိန်အနည်းငယ်အကြာမှာတော့ အကြမ်းဖက်စစ်တပ်က လက်နက်ကြီးတွေပါ သုံးလာတဲ့ အတွက် လက်နက်အင်အားမမျှတာကြောင့် တူမီးသေနတ်ကိုင်ဆောင်ထားသူတွေက ပြန်လည်ဆုတ်ခွာပေးခဲ့ရတယ်လို့ ဒေသခံတွေရဲ့ ပြောပြချက်အရ သိရပါတယ်။ 

ဒါ့အပြင် ဂန့်ဂေါဘက်ကလည်း စစ်ကောင်စီအကြမ်းဖက်တပ်တွေ ကား ၁၁ စီးနဲ့ စစ်ကူပေးဖို့ သွားတာတွေလည်း ရှိနေတယ်လို့ မျက်မြင်ဒေသခံတွေက ပြောပါတယ်။

လက်ရှိမှာတော့ အထိအခိုက်အကျအဆုံးအခြေအနေအသေးစိတ်မသိရသေးပါဘူး။ မနေ့က ညနေပိုင်းက‌လည်း အဲဒီလမ်းပေါ်က အနည်းဆုံး နေရာ နှစ်ခုလောက်မှာ ပစ်ခတ်မှုတွေ ဖြစ်ခဲ့ပါတယ်။