သာကေတတွင် အကြမ်းဖက်စစ်အုပ်စု၏ ပစ်ခတ်မှုကြောင့် ၁ ဦးကျဆုံး၊ ၂ ဦး ဒဏ်ရာပြင်းထန်
DVB
·
March 29, 2021
ရန်ကုန်မြို့ သာကေတမြို့နယ်၊ သုမနလမ်းပေါ်က စစ်အာဏာရှင်ဆန့်ကျင်ရေး ဆန္ဒပြ သပိတ်ကို ဒီနေ့မနက် ၁၀ နာရီလောက်က အကြမ်းဖက်စစ်အုပ်စုရဲ့ ပစ်ခတ်ဖြိုခွင်းမှုကြောင့် ၁ ဦးကျဆုံးပြီး ၂ ဦးဒဏ်ရာရရှိခဲ့တယ်လို့ ကနဦးသိရှိရပါတယ်။
အကြမ်းဖက်စစ်တပ်က ပစ်ခတ်မှုကြောင့် ဦးခေါင်းထိမှန်သူ ကျဆုံးခဲ့ပြီး ညာဘက်တင်ပါး ထိသူတစ်ဦးနဲ့ လက်မောင်းထိသူတစ်ဦးရှိတယ်လို့ မျက်မြင်တွေ့ရှိသူတစ်ဦးက ပြောပါတယ်။
"သူတို့တွေက မနက် ၁၀နာရီခွဲလောက်မှာ ရာဘာကျည်နဲ့ရော ကျည်အစစ်နဲ့ပါပစ်တာ။ ကောင်းလေးတစ်ယောက်ခေါင်းထိသွားတယ်" လို့ ဆိုပါတယ်။
လက်ရှိအချိန်ထိတော့ အကြမ်းဖက်စစ်တပ်ရဲ့ တပ်ဖွဲ့ဝင်တွေက သာကေတမြို့နယ်၊ သုမနလမ်းမပေါ်က အမှတ်(၂) ဈေးရှေ့မှာ နေရာယူထားသေးတယ်လို့ သိရပါတယ်။
