မွန်ပြည်နယ်၊ ပေါင်မြို့မှာ စက်သုံးဆီပြတ်လပ်တော့မယ်ဆိုတဲ့သတင်းကြောင့် ဒီကနေ့ မတ်လ ၂၄ ရက် နေ့လယ်ပိုင်းကစပြီး ဒေသခံပြည်သူတွေ လောင်စာဆီ အလုအယက်ဝယ်ယူနေကြပါတယ်။
ပေါင်မြို့မှာ စက်သုံးဆီပြတ်လပ်လာပါက စက်ယန္တားနဲ့လုပ်ဆောင်နေရတဲ့ လုပ်ငန်းတွေ ရပ်ဆိုင်းမှုမရှိစေရေးအတွက် အခုလိုဝယ်ယူထားရတာဖြစ်တယ်လို့ ဒေသခံဦးမောင်မြင့်က DVB ကိုပြောပါတယ်။
" ဆီတွေမရောင်းတော့ဘူးဆိုပြီးတော့ ဒီနေ့လယ်ပိုင်းမှသတင်းကြားရတာ။ Denko ဆီဆိုင်မှာ သွားဝယ်တော့ ဆိုင်ပိတ်ထားလို့ ဒီမှာလာဝယ်တာပါ။ ဆီမရှိရင် ကျနော်တို့ အလုပ်တွေက လုပ်လို့မရတော့ဘူးလေ။ နောက်ပြီးဆိုင်ကယ်က နေ့တိုင်းစီးနေရတော့ ဆီမရှိရင် ကုန်းကြောင်းသွားလို့က အဆင်မပြေတော့ဘူးပေါ့"။
ပေါင်မြို့မှာ ဒီကနေ့ မွန်းလွဲ ၁ နာရီလောက်ကစပြီး DENKO စက်သုံးဆီအရောင်းဆိုင်မှ ဆီရောင်းချမှုကို ရပ်ဆိုင်းလိုက်တာကြောင့် ဒေသခံတွေအနေနဲ့ စက်သုံးဆီပြတ်လပ်မှာကို စိုးရိမ်နေကြတာပါ။
" လူတွေက ဒီနေ့လယ်ပိုင်းလောက်မှ အုပ်စုလိုက် အတင်းလုပြီးလာဝယ်ကြတာ။ ဒါကို အခွင့်ကောင်းယူပြီး စျေးတင်ရောင်းတာလည်း မရှိပါဘူး။ ကျနော့်ဆီမှာ ရှိသလောက်အားလုံးကိုရောင်းပေးသွားမှာပါ။ အမှန်တကယ်က ဆီပြတ်ဖို့အနေအ ထားလုံးဝမရှိသလို စျေးနှုန်းမြင့်တက်ဖို့လည်း မရှိပါဘူး။ စျေးနှုန်းပြန်ကျနိုင်တဲ့ အနေအထားတောင်ရှိပါတယ်" လို့ စက်သုံးဆီအရောင်းဆိုင်မှ လုပ်ငန်းရှင်တစ်ဦးကပြောပါတယ်။
ပေါင်မြို့နယ်မှာ လက်ရှိအချိန်ထိ စက်သုံးဆီစျေးနှုန်းမှာ ဒီဇယ် ၁ လီတာကို ၈၅၀ ကျပ်၊ ဓာတ်ဆီ (92) ၁ လီတာကို ၈၇၅ ကျပ်၊ (95)၁လီတာကို ၉၂၅ ကျပ်နှုန်းနဲ့ ရောင်းချပေးနေကြောင်း သိရပါတယ်။
မြန်မာနိုင်ငံတဝန်းမှာ အကြမ်းဖက်စစ်အာဏာရှင်အုပ်စုကို ဆန့်ကျင်ကန့်ကွက်တဲ့အနေနဲ့ ပြည်သူတွေက ဒီကနေ့ ဈေးတွေ၊ ဆိုင်တွေပိတ်ပြီး လမ်းပေါ်မထွက်ဘဲ ဆန္ဒပြနေကြချိန်မှာ မွန်ပြည်နယ် ပေါင်မြို့မှာ အခုလို စက်သုံးဆီပြတ်လပ်တော့မယ်ဆိုတဲ့သတင်းထွက်လာတာပါ။
