မော်လမြိုင်မြို့၊ ဈေးကြိုရပ်၊ ရတနာထွန်းပွဲရုံအနီးမှာ ဖေဖော်ဝါရီ ၂၈ ရက်နေ့ ညနေ ၅ နာရီခွဲလောက်မှာ လူငယ်တစ်ဦး သေနတ်ကျည်ဆန် ဦးခေါင်းထိမှန်သေဆုံးခဲ့တယ်လို့ လူမှုကယ်ဆယ်ရေးအဖွဲ့တွေက DVB ကို အတည်ပြုပါတယ်။
သေဆုံးခဲ့တဲ့ အသက် ၁၉ နှစ်အရွယ် လူငယ်ဟာ မော်လမြိုင်မှာ စစ်အာဏာရှင်ကို ငြိမ်းချမ်းစွာ ဆန္ဒပြရင်း ရဲတပ်ဖွဲ့နဲ့ စစ်တပ်တို့ရဲ့ အကြမ်းဖက် ပစ်ခတ်မှုကြောင့် ပထမဦးဆုံး သေဆုံးခဲ့တာ ဖြစ်ပါတယ်။
သေဆုံးခဲ့တဲ့ ဒီလူငယ်ဟာ အစ္စလာလမ် ဘာသာဝင်ဖြစ်တဲ့အတွက်ကြောင့် မော်လမြိုင်က အစ္စလာမ်သုသာန်ကို ပို့ဆောင်လိုက်ပြီးလို့ လူမှုကယ်ဆယ်ရေးအဖွဲ့ တာဝန်ရှိသူတွေက ပြောပါတယ်။
မော်လမြိုင်မှာ ဖေဖော်ဝါရီ ၂၈ ရက်နေ့ နေ့လယ်ပိုင်းမှာ စစ်အာဏာရှင် အလိုမရှိကြောင်း ဆန္ဒထုတ်ဖော်ခဲ့တဲ့ သပိတ်စစ်ကြောင်း အသီးသီးကို ရဲတပ်ဖွဲ့အင်အားသုံး ပစ်ခတ် ဖြိုခွင်းခဲ့တဲ့အတွက်ကြောင့် ၃၀ ဦးထက်မနည်း ထိခိုက်ဒဏ်ရာရရှိခဲ့ပါတယ်။
