တာချီလိတ် ဆန္ဒထုတ်ဖော်ပွဲမှာ တိုင်းသားများနှင့် ဝန်ထမ်းများ ပူးပေါင်းပါဝင်လာ
DVB
·
February 11, 2021
အာဏာသိမ်းစစ်အစိုးရ အလိုမရှိကြောင်း တာချီလိတ်မြို့မှာ ဆန္ဒထုတ်ဖော်ပွဲမှာ ဒေသခံတိုင်းသားတွေအပြင်၊ ရဟန်းရှင်လူနဲ့ နိုင်ငံဝန်ထမ်းတွေ ပါဝင်လာပါတယ်။
တာချီလိတ်လမ်းမကြီးတစ်လျှောက် ချီတက်ဆန္ဒပြခဲ့ကြပြီး ထိုင်း-မြန်မာ ချစ်ကြည်ရေးတံတား(၂)ထိပ်မှာ ရဲတပ်ဖွဲ့က လမ်းပိတ်ဆို့မှုများ ပြုခဲ့တာကြောင့် ထိပ်တိုက်ရင်ဆိုင်တွေ့ဆိုခြင်းမပြုဘဲ လမ်းကြောင်းပြောင်းပြီး မြို့တွင်းကို ပြန်ချီတက်ခဲ့ကြတယ်လို့ ဆန္ဒပြသူတွေက ပြောပါတယ်။
သပိတ်စစ်ကြောင်းကို တာချီလိတ် ခရိုင်စုပေါင်းရုံးရှေ့မှာ ထိုင်သပိတ်ဆက်လက်လုပ်ဆောင် ကြွေကြော်ပြီး လူအုပ်ခွဲခဲ့တယ်လို့ သိရပါတယ်။
ချီတက်ဆန္ဒထုတ်ဖော်ပွဲမှာ လူငယ်အများစု ပါဝင်လာပြီး ရွှေ့ပြောင်းအလုပ်သမားတွေအပါအဝင် အင်အား ထောင်ချီပါဝင်လာခဲ့ကြတယ်လို့ ဆိုပါတယ်။
ကိုဇက်
