တပ်မတော် အာဏာသိမ်းတာကို ဆန့်ကျင်ကြောင်း စစ်ကိုင်းမြို့ရှိ တက္ကသိုလ်တွေက ဆရာ/ ဆရာမတွေ၊ ဝန်ထမ်းတွေနဲ့ မြန်မာ့မီးရထားစက်ခေါင်းစက်ရုံ (ရွာ‌ထောင်) ဝန်ထမ်းတွေဟာ ဒီနေ့မနက်က ဖဲကြိုးနီများတပ်ဆင်ပြီး အကြမ်းမဖက်နည်းနဲ့ လက်သုံးချောင်းထောင် အာဏာဖီဆန်ရေးလှုပ်ရှားမှု (Civil Disobedience Movement) ပြုလုပ်ခဲ့ကြပါတယ်။

စစ်ကိုင်းပညာရေးတက္ကသိုလ်ရှိ ဆရာ/ဆရာမ ၁၁၇ ဦးက Civil Disobedience Movement မှာ ပူပေါင်းပါဝင်သွားမည်ဖြစ်ပြီး မြန်မာတစ်နိုင်ငံလုံးရှိ ဆရာ/မ တွေအနေနဲ့လည်း ပါဝင်ပူးပေါင်း ကြဖို့ အပါအဝင် အချက် ၄ ချက်ပါ သဘောထားကြေညာချက်တစ်စောင် ထုတ်ပြန်ခဲ့ပါတယ်။

“ကျနော်တို့ ဒီနေ့ပြုလုပ်ရတဲ့ရည်ရွယ်ချက်က အခု စစ်တပ်ကဖမ်းဆီးထားတဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံတော်သမ္မတဦးဝင်းမြင့်တို့ကို အမြန်ဆုံး ပြန်လွှတ်ပေးဖို့နဲ့ ပြည်သူက ရွေးချယ်တင်မြှောက်ထားတဲ့ ပြည်သူ့ကိုယ်စားလှယ်တွေကို အသိအမှတ်ပြုဖို့ အဓိကထား တောင်းဆိုခဲ့ပါတယ်” လို့ မြန်မာ့မီးရထားစက်ခေါင်းစက်ရုံ ဆန္ဒဖော်ထုတ်ပွဲဦးဆောင်သူတစ်ဦးက ပြောပါတယ်။

အာဏာသိမ်းမှု ဆန့်ကျင်ကြောင်းလှုပ်ရှားမှုကို တက္ကသိုလ်ဝင်းနဲ့ စက်ရုံဝင်းအတွင်းမှာ ငြိမ်းချမ်းစွာ ဆန္ဒဖော်ထုတ်ခဲ့ကြပါတယ်။

သတင်း - ရဲနိုင်ဆွေ