တပ်မတော်က အာဏာသိမ်းလိုက်တာကြောင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသ ဘောတူစာချုပ် (အန်စီအေ) နဲ့ ငြိမ်းချမ်းရေးလုပ်ငန်းစဉ် ရပ်ဆိုင်းသွားနိုင်တယ်လို့ သျှမ်းပြည်ပြန်လည်ထူထောင်ရေးကောင်စီ RCSS က သတင်းထုတ်ပြန်ပါတယ်။ 

တပ်မတော်က ဒီမိုကရေစီအရပ်သားအစိုးရဆီကနေ အာဏာသိမ်းယူပြီး အရေးပေါ် အခြေအနေကြေညာလိုက်တာ‌ဟာ ယုံကြည်မှုတည်ဆောက်တာနဲ့ ငြိမ်းချမ်းရေးလုပ်ငန်းစဉ်ကို ထိခိုက်စေပြီး ဒီမိုကရေစီကို ဆန့်ကျင်တဲ့အတွက် အာဏာသိမ်းတာကို ကန့်ကွက်ကြောင်း အန်စီအေ လက်မှတ်ထိုးထားတဲ့ RCSS က ပြောပါတယ်။

RCSS ဟာ ဖက်ဒရယ်နဲ့ ဒီမိုကရေစီအတွက် ပြည်သူလူထုတရပ်လုံးနဲ့ အတူတကွ ရပ်တည်ပြီး ကြိုးပမ်းဆောင်ရွက်သွားမယ်လို့လည်း ထုတ်ပြန်ပါတယ်။

အာဏာသိမ်းအပြီး ဖြစ်ပေါ်လာတဲ့ နိုင်ငံရေးအကျပ်အတည်းကို ကျော်လွှားနိုင်ဖို့ သက်ဆိုင်ရာအဖွဲ့အစည်းအသီးသီး တွေ့ဆုံဆွေးနွေးညှိနှိုင်းကြပြီး ငြိမ်းချမ်းစွာ ဖြေရှင်းကြဖို့လည်း တိုက်တွန်းထားပါတယ်။

အောင်သူ