ဝါးခယ်မတွင် ပိတ်ထားသည့် စီမံကိန်းတူးမြောင်းအား ဖယ်ရှားခဲ့မှုဖြင့် ၃၂ ဦး တရားစွဲခံရ
DVB
·
December 23, 2020
ဧရာဝတီတိုင်း၊ ဝါးခယ်မမြို့နယ်၊ ကျုံပဒုတ်ချောင်းဝကျေးရွာမှာ အင်းသားကြီးက ပိတ်ဆို့ငါးဖမ်းနေတဲ့ အမှတ် ၄ စီမံကိန်းတူးမြောင်းက အတားအဆီးတွေ ဖယ်ရှားခဲ့တဲ့ လယ်သမားနဲ့ ဒေသခံ စုစုပေါင်း ၃၂ ဦးကို မြို့နယ်အုပ်ချုပ်ရေးက တရားစွဲဆိုခဲ့တယ်လို့ သိရပါတယ်။
စီမံကိန်းတားကို ပိတ်ဆို့ငါးဖမ်းတာတွေ ပြုလုပ်နေတာကြောင့် လယ်သမားတွေ ရေမရရှိတော့လို့ စပါးများစွာ ပျက်စီးဆုံးရှုံးခဲ့သလို ဆောင်းစပါ;စိုက်ဖို့အတွက် လယ်သမားတွေက သက်ဆိုင်ရာဌာနတွေကို စာပေးပို့ အကူအညီတောင်းခံခဲ့ပြီး ဒီဇင်ဘာလ ၁၀ ရက်နေ့က အတားအဆီးတွေကို ဖယ်ရှားခဲ့တာကြောင့် ခုလို တရားစွဲခံရတာလို့ သိရပါတယ်။
“ပြည်သူအယောက် ၃၂ ဦး ကို ၁၈၈ နဲ့ မြို့နယ်ထွေအုပ်က တရားလိုလုပ်ထားတယ်လို့ ရွှေလောင်းနယ်မြေစခန်းမှုး ဦးမျိုးလှိုင်ပြောပြတာ သိရပါတယ်။ ဒီနေ့ သမန်စာ လာပို့တော့ စာပို့လုလင်ရယ်၊ လုံခြုံရေးရဲ ၅ ယောက်လောက် ပါလာပါတယ်”လို့ လယ်သမားအရေး ကူညီဆောင်ရွက်နေသူ မသန်းသန်းမိုးက ပြောပါတယ်။
စီမံကိန်းတားကို ပိတ်ဆို့တာတွေဖယ်ရှားခဲ့တဲ့ အထဲက လူ ၁ ဦး၊ လာရောက်ကြည့်ရှုသူ ၅ ဦး စုစုပေါင်း ၆ ဦးကို အင်းသားကြီးက ရဲစခန်းမှာ ပုဒ်မ ၃ ခုနဲ့ အမှုဖွင့်ထားသလို အထွေထွေအုပ်ချုပ်ရေးဦးစီးဌာနက အနီးအနားမှာ ရောက်ရှိနေသူ ၃၂ ဦးကို ပုဒ်မ ၁၈၈ နဲ့ တရားစွဲထားတယ်လို့ ဒေသခံတွေထံက သိရပါတယ်။
အနီးအနားကို ရောက်နေလို့ ပုဒ်မ ၁၈၈ (ပြည်သူ၀န်ထမ်းက နည်းလမ်းတကျ ထုတ်ပြန်ချမှတ်ထားသည့် ဒေသန္တရအမိန့်ကို ဖီဆန်မှု) နဲ့ တရားစွဲခံထားရသူတွေကတော့ အတားအဆီးတွေ ဖယ်ရှားတဲ့နေရာကို ညနေပိုင်းမှသာ သွားရောက်ခဲ့တယ်လို့ ပြောဆိုပါတယ်။
ဝါးခယ်မမြို့နယ်၊ ကျုံပဒုတ်ချောင်းဝ အပါအဝင် ရွာ ၄ ရွာမှာ အမှတ်-၄ စီမံကိန်းတူမြောင်းက ရေကိုအသုံးပြုပြီး လယ်ဧက ၄ ထောင်ကျော် စိုက်ပျိုးနေရကာ ပြီးခဲ့တဲ့ရာသီက ဆည်မြောင်အား အင်းသားကြီးက ပိတ်ဆို့ထားလို့ မိုးစပါး ဧက ၂ ထောင်ကျော် ပျက်စီးခဲ့ရပြီး ဆောင်းစပါးကာလမှာ စိုက်ပျိုးရေးအတွက် အခက်အခဲဖြစ်နေတယ်လို့ ဒေသခံတွေဆီက သိရပါတယ်။
သတင်း - မင်းထက်မုန်း (ပုသိမ်)၊ ဓာတ်ပုံ - ချစ်မင်းထက် (ပန်းတနော်)
